بولاشاقتا قىتاي ءتىلىن ۇيرەنۋگە تۋرا كەلەدى - د. نازاربايەۆا
بولاشاقتا قىتاي ءتىلىن ۇيرەنۋگە دە تۋرا كەلەدى، دەيدى پرەمەر-ءمينيستردىڭ ورىنباسارى د. نازاربايەۆا ءبىلىم جانە عىلىم مينيسترلىگىنىڭ كەڭەيتىلگەن القا ماجىلىسىنە قاتىسا وتىرىپ.
«مەملەكەت باسشىسى العا قويعان ءۇش ءتىل ۇيرەنۋ مىندەتى ەكى-ءۇش جىلدا تولىق ورىندالۋى كەرەك. ءبىراق، كەيبىر ادامدار اسىرەسە، وڭتۇستىك وڭىرلەردە «اعىلشىن ءتىلىن ۇيرەنۋ مۇمكىن ەمەس، مەنىڭ دە، بالامنىڭ دا قولىنان كەلمەيدى» دەپ ايتاتىن كورىنەدى. ولاي ەمەس. بالاعا ءۇش تىلدە ساباق بەرۋ ءۇشىن پروفەسسورلار مەن ۇستازدار ءۇش ءتىلدى جاقسى يگەرۋى كەرەك»، - دەيدى پرەمەر-ءمينيستردىڭ ورىنباسارى.
د. نازاربايەۆانىڭ پايىمداۋىنشا، اعىلشىن ءتىلى قازاقستاندا ءبىر- ەكى جىل بويى ۇزدىكسىز دامىپ، وقۋشىلار مەن جاستار ەركىن سويلەيتىن دەڭگەيگە جەتىپ الۋ كەرەك. سەبەبى، ءبىراز ۋاقىتتان كەيىن قىتاي ءتىلىن ۇيرەنۋگە تۋرا كەلەدى.
«مەنىڭ كەم دەگەندە ءۇش ءتىل دەپ ايتۋىمنىڭ دا ءمانى بار. سەبەبى، جاقىن بولاشاقتا بىزگە قىتاي ءتىلىن ۇيرەنۋگە تۋرا كەلەدى. قىتاي - بۇل ءبىزدىڭ كورشىمىز. قىتاي بۇگىندە قارقىندى دامىپ كەلە جاتقان مەملەكەت. قازىر ءبىرشاما باسەڭدەۋ بايقالعانىمەن بۇل قىتاي، ولار الداعى 100 جىلعا ارنالعان وي-پايىممەن ارەكەت ەتەدى. سوندىقتان، ول ەلدە ءبارى جاقسى بولادى. قىتاي - بۇل ءبىزدىڭ دوسىمىز، ماڭىزدى ساۋدا سەرىكتەسىمىز جانە ەل ەكونوميكاسىنىڭ ءىرى ينۆەستورى. بۇل ەرتەڭ ءبىزدىڭ بالالارىمىز وسى ونەركاسىپتەگى زاۋىتتاردا نەمەسە اۋىل شارۋاشىلىعىندا سۇرانىسقا يە بولادى دەگەن ءسوز. باتىس ەۋروپا مەن ءبىزدىڭ ازيالىق دوستارىمىز دا كوپتەگەن ينۆەستيتسيالار سالىپ جاتىر. سوندىقتان، ءتىل بىلمەي، بالالارىمىز تابىستى قىزمەتتە بولادى دەۋ قيىن»، - دەدى د. نازاربايەۆا.
اۆتور: كەنجەكەي توقتامۇرات قىزى