قاراعاندىدا اياعى اۋىر ايەلدىڭ ولىمىنە بايلانىستى دەنساۋلىق ساقتاۋ ءمينيسترى تۇسىنىك بەردى

استانا. قازاقپارات - قاراعاندىدا اياعى اۋىر ايەلدىڭ ولىمىنە تۇماۋدىڭ اسقىنۋى سەبەپ بولدى. بۇل تۋرالى بۇگىن سەناتتا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.

«بالا بوسانۋ بولىمىنە تۇسكەن ايەل نەگىزىنەن تۇماۋعا قارسى ۆاكتسينا الماعان. سوندىقتان اۋرۋدىڭ بەلگىلەرى باستالعان ساتتەن-اق بارلىق ازاماتتار دارىگەرگە ۋاقىتىلى كورىنۋلەرى كەرەك»، - دەدى مينيستر ت. دۇيسەنوۆا جۋرناليستەرگە بەرگە سۇحباتىندا.

ايتا كەتەرلىگى، بۇعان دەيىن قاراعاندىدا اياعى اۋىر كەلىنشەك قايتىس بولعانى حابارلانعان بولاتىن. دارىگەرلەردىڭ سوزىنشە، ايەل ءوز بەتىنشە ەمدەلىپ، تۇرعىلىقتى جەرىندەگى اۋرۋحاناعا دەر كەزىندە بارماعان.

«تۇماۋدىڭ ءورشيتىن كەزەڭى - قاراشادان باستالىپ اقپاننىڭ اياعىنا دەيىن بارادى. وسىنداي وقيعالار بولماس ءۇشىن ءبىز ەگۋ جۇمىستارىن جۇرگىزىپ كەلەمىز. 1 ميلليون 700 مىڭ ادامعا ەگۋ جۇمىستارى جاسالدى. كەيبىر ازاماتتار بۇدان باس تارتسا، كەيبىرى ۇلگەرمەگەن. قازىر تۇماۋدان 165 ادام اۋرۋحاناعا جاتقىزىلىپ، ولارعا كومەك كورسەتىلۋدە»، - دەدى مينيستر.

اۆتور: قانات مامەتقازى ۇلى