وڭتۇستىك قازاقستاندىق اگرونومدار فينليانديالىق ارىپتەستەرىمەن تاجىريبە الماستى

استانا. قازاقپارات - وڭتۇستىك قازاقستان وبلىسىندا تامشىلاتىپ سۋارۋ ادىسىنە جاڭا مينەرالدى تىڭايتقىشتار ەندىرۋ باعىتىندا اۋىل شارۋاشىلىعى ماماندارىنىڭ سەمينارى ءوتتى.

اتالعان شارانى وبلىستىق كاسىپكەرلىك مەكتەبى مەن «كوس اگرو كوممەرتس» اگرو-حيميالىق كومپانياسىمەن بىرلەسىپ ۇيىمداستىردى.

وندا شارۋالارعا جابىق توپىراقتا قىزاناق جانە قياردى، الما تۇپتەرىن تامشىلاتىپ سۋارۋدا سۋدا ەريتىن Calcinit جانە Kristalon تىڭايتقىشتارىنىڭ جاڭا ءتۇرى تانىستىرىلدى. سونداي-اق، سەمينارعا فينليانديالىق ۇزدىك اگرونومدار قاتىسىپ، كوكونىس جىلىجايلارىندا حيميالىق تىڭايتقىشتاردى دۇرىس قولدانۋ ادىسىمەن ءبولىستى.

باس قوسۋدا سونىمەن قاتار، فينليانديالىق «Yara» كومپانياسىنىڭ وكىلى ۋللا سۋندەل، IOS جانە Android پلاتفورمالارىنان تابۋعا بولاتىن «Yara CheckIT» موبيلدى قوسىمشاسىن دا تانىستىردى. ونىڭ ارتىقشىلىعى سول، باعدارلامانىڭ ىشىندە وسىمدىكتىڭ اۋرۋعا شالدىعۋىنىڭ سەبەبىن انىقتاپ، ونىڭ الدىن الاتىن ەمدەۋ امالدارى تۋرالى نۇسقاۋلىقتار جيىنتىعى ورنالاسقان.

اتالعان جوباعا الەمنىڭ 50 مەملەكەتىنىڭ اگرونومدارى وڭ باعاسىن بەرىپ، شارۋا قوجالىعىندا تاپتىرماس كومەك ەكەنىن تىلگە تيەك ەتتى. ەندى وڭتۇستىك وڭىرىنە دە كەلىپ جەتكەن بۇل جاڭالىققا جيىنعا قاتىسۋشىلار ۇلكەن قىزىعۋشىلىق تانىتىپ وتىر، دەپ حابارلايدى و ق و اكىمىنىڭ باسپا ءسوز قىزمەتى.