قىتايداعى سالتاناتتى شەرۋگە ىلەدەگى قازاق جىلقىسى تاڭداپ الىندى

استانا. قازاقپارات - بۇدان بىلاي قىتايدىڭ مەملەكەتتىك سالتاناتتى شارالارىنا ىلە جىلقىسى عانا مىنىلەدى.

نەگىزىنەن قازاقتار كوپ شوعىرلانعان ايماقتاعى بۇل جىلقىنىڭ تۇرقى بيىك، شىدامدى كەلەدى. ونى حالىق اراسىندا ىلە قازاق جىلقىسى دەپ تە اتايدى. بۇل تۋرالى «شىڭجاڭ» جاڭالىقتارى باسىلىمى جازدى.

بەيجىڭدە قاڭتار ايىندا جىلقى شارۋاشىلىعى قاۋىمداستىعىنىڭ وتىرىسى وتكەن. جيىندا قىتايدىڭ سالتاناتتى شەرۋگە ارنالعان جىلقى ءتۇرىن تاڭداۋ ماسەلەسى قارالعان. تالاپ بويىنشا، جانۋار بويىنىڭ بيىكتىگى - 1 مەتر 60 سانتيمەتر، ءتۇرى قارا نەمەسە قارا تورى بولۋى شارت. ماماندار ءوزارا اقىلداسا كەلە كوپتەگەن جىلقى تۇقىمىنىڭ ىشىنەن قازاقتىڭ ىلە جىلقىسىن تاڭدايدى. ءتۇرلى سپورتتىق سايىستاردا جەڭىمپاز اتانىپ، كوزگە ءتۇسىپ جۇرگەن جانۋاردىڭ بۇل ءتۇرى تۇرقى بيىك، مىنەزى جۇمساق، ۇيرەتۋگە جەڭىل بولىپ كەلەدى ەكەن.

 www.24.kz