دوپتى حوككەي: الەم چەمپيوناتىندا قازاقستاندىقتار رەسەيلىكتەردەن ۇتىلدى
12:18, 02 - اقپان 2016
استانا. قازاقپارات - كەشە ۋليانوۆسك قالاسىندا باستالعان دوپتى حوككەيدەن كەزەكتى الەم چەمپيوناتىندا كۇشتىلەردىڭ «ا» توبىندا كۇتپەگەن ناتيجە تىركەلە قويعان جوق.
رەسەي دوپتى حوككەي فەدەراتسياسىنىڭ سايتىنان الىنعان مالىمەتكە قاراعاندا، قازاقستان قۇراماسى رەسەيلىكتەردەن 1:9 ەسەبىمەن ويسىراي ۇتىلدى (قازاقستاندىقتاردان گولدىڭ اۆتورى - سەرگەي پوچكۋنوۆ).
شۆەدتەر ءدال وسىنداي ەسەپپەن فين قۇراماسىن تىزە بۇكتىردى. قازاقستاندىقتاردى كوماندا كاپيتانى، ورال دوپتى حوككەيىنىڭ تۇلەگى، قازىرگى كەزدە نوۆوسىبىردىڭ «سيبسەلماشىندا» ونەر كورسەتەتىن راۋان يساليەۆ ايدىنعا باستاپ شىقتى.
بۇگىن شۆەتسيا - قازاقستان، رەسەي - فينليانديا قۇرامالارى ءوزارا كۇش سىناسادى. ايتا كەتەيىك، دۇنيەجۇزىلىك دودادا جۇلدەگە تالاساتىندار دا - وسى ءتورت كوماندا. سونىڭ ىشىندە رەسەي مەن شۆەتسيا التىن مەدالدان دامەلى بولسا، قازاقستان مەن فينليانديا قولا جۇلدەگە قول سوزىپ كەلەدى.
اۆتور: ەلجان ەرالى