پەتروپاۆلدىق وقۋشىلار جارامسىز بىلعارى زاتتاردى كادەسىيعا اينالدىرۋدا - كەسكىن

استانا. قازاقپارات - پەتروپاۆلدىق وقۋشىلار تەرى وڭدەۋ ونەرىنە ماشىقتانىپ العان. ولار بىلعارىدان جاسالعان ەسكى زاتتاردى كادەگە جاراتىپ، سومكە، قاپشىق جانە كادەسىيلار دايىندايدى.

كوزدىڭ جاۋىن الاتىن بۇيىمداردىڭ اراسىندا بەزەندىرىلگەن پاننو دا بار. بۇل شاعىن شەبەرحاناعا تۇسكەن ەسكى بىلعارى ەتىك، كۇرتە، سومكەلەرگە قايتا جان ءبىتىپ، قايتالانباس كادەسىيلارعا اينالىپ شىعا كەلەدى، دەپ جازادى 24.kz.

بىلعارىنى كوركەم وڭدەۋ ۇيىرمەسىنىڭ جەتەكشىسى تاتيانا ماندريك وقۋشىلارىن قول ەڭبەگىنىڭ قۇندىلىعىنا ۇيرەتەدى. سوندىقتان بالالار ءوندىرىسى جوباسىن جۇزەگە اسىردى. شەبەرحانادا جاسالعان بۇيىمدار ساتىلىپ، اقشانىڭ ءبىر بولىگى اۆتورعا، ال ءبىر بولىگى ىسكە جۇمسالادى.

«وقۋشىلار ءوندىرىستىڭ قىر-سىرىنا وسى باستان قانىعىپ جاتىر. ەرتەڭ ءبىرى تىگىنشى، ءبىرى جيھازشى بولار. سوندا وزدەرىنىڭ ءبىلىپ-ۇيرەنگەندەرىن ىسكە جاراتادى. ەڭ باستىسى، ءوز قولىمەن جاسالعان بۇيىمنىڭ باعالى ەكەنىن تۇسىنەدى»، - دەدى بىلعارىنى كوركەم وڭدەۋ ۇيىرمەسىنىڭ جەتەكشىسى تاتيانا ماندريك.

جاس شەبەرلەر ءتۇرلى كورمە-جارمەڭكەلەرگە قاتىسىپ تۇرادى. قازىر ولار 8- ناۋرىز حالىقارالىق ايەلدەر كۇنىنە ارنالعان سىيلىقتار جاساپ جاتىر.