الماتى مەن استانانىڭ ستۋدەنتتەرى قازاقستان پارلامەنتى تاريحىمەن تانىستى
شارا بارىسىندا بولاشاق زاڭگەرلەر، ساياساتتانۋشىلار مەن الەۋمەتتانۋشىلار جوعارى زاڭ شىعارۋ ورگانىنىڭ عيماراتىندا ساياحات جاساپ، سەنات پەن ءماجىلىستىڭ وتىرىس زالدارىندا، بىرلەسكەن وتىرىس زالىندا، حالىقارالىق كەزدەسۋ زالىندا، باسپا ءسوز ورتالىعىندا، كىتاپحانادا بولدى، جۇمىس ورگاندارىنىڭ قىزمەتىمەن تانىستى.
شارا بارىسىندا سەنات پەن ءماجىلىس اپپاراتتارىنىڭ قىزمەتكەرلەرى قوس پالاتالى پارلامەنتتىڭ تاريحىمەن تانىستىردى. وسىدان ءدال 20 جىل بۇرىن 1996-جىلعى 30- قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پارلامەنتتىڭ العاشقى وتىرىسىن اشقان بولاتىن. ستۋدەنتتەرگە ءتۇرلى شاقىرىلىمداعى دەپۋتاتتاردىڭ قىزمەتى تۋرالى اڭگىمەلەپ، شەتەلدىك پارلامەنتتىك دەلەگاتسيالاردىڭ ەستەلىك سىيلىقتارىنىڭ كورمەسى تانىستىرىلدى.
پارلامەنتتە بولعان كەزدە ستۋدەنتتەر سەنات دەپۋتاتى ءبىرعانىم ايتىموۆامەن كەزدەسىپ، قازاقستان پارلامەنتاريزمىنىڭ دامۋى تۋرالى لەكسياسىن تىڭدادى، سونداي-اق زاڭ شىعارۋ جۇمىستارىنىڭ ەرەكشەلىكتەرى جانە كەيبىر قۇقىقتىق اكتىلەردىڭ مازمۇنى تۋرالى قويىلعان ساۋالدارعا جاۋاپ الدى.
اۆتور: سەرىك قاراجان