رەسەيدەگى قازاق يمامدارى الماتىداعى يسلام ينستيتۋتىندا ءدىني بىلىمدەرىن جەتىلدىرىپ جاتىر

استانا. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى ەرجان قاجى مالعاجى ۇلى رەسەي فەدەراتسياسىنا جاساعان رەسمي ساپارى بارىسىندا ومبى قالاسىنىڭ يمامدارىمەن كەزدەستى، دەپ حابارلايدى ق م د ب باسپا ءسوز قىزمەتى.

قازاق ءدىن قىزمەتكەرلەرىنىڭ وسىعان دەيىنگى ءوتىنىشى بويىنشا ءدىني باسقارما تاراپىنان «ءدىن - ناسيحات»، «جۇما ۋاعىزى»، ت. ب كىتاپتار جەتكىزىلدى. ۋاعىز ايتۋدىڭ ءتارتىبى، باعىتى كورسەتىلگەن، جالپى ناسيحات تاقىرىپتارى مەن ءماتىنى قامتىلعان وقۋ قۇرالدارىن باس ءمۇفتي ەرجان قاجى مالعاجى ۇلى رەسمي تۇردە تابىستادى.

ومبى وبلىسىنىڭ مۇفتيى بوتا حازرەت باكۋلەن ءدىني باسقارمانىڭ بۇل قامقورلىعىنا العىسىن ءبىلدىرىپ، اقساقالدار باتاسىن بەردى.

ايتا كەتەيىك، بۇگىندە رەسەيدىڭ ورىنبور، ومبى، التاي ايماعىنداعى قازاق يمامدارى الماتىداعى يسلام ينستيتۋتىندا ءدىني بىلىمدەرىن جەتىلدىرۋدە. شەتتەگى قانداستارىمىز ءدىني شاپانمەن قامتاماسىز ەتىلىپ، ولارعا تۇراقتى وقۋ قۇرالدارى، ءدىني كىتاپتار جەتكىزىلىپ تۇرادى.