بۇل تۋرالى BBC حابارلايدى. مۋرتازا احمادي اتتى جانكۇيەر ەلدىڭ شىعىسىنداعى گازني پروۆينتسياسىندا تۇرادى ەكەن.
بالانىڭ تەك ارقاسىنان عانا ەمەس، سونداي-اق الدىنان تۇرىپ تۇسىرىلگەن سۋرەتتەرىن ىزدەۋ جاريالانعاننان كەيىن ونىڭ اۆستراليادا تۇراتىن تۋىسى ازيم احمادي عالامتورعا دالەل رەتىندە شىعارىپتى.
وسى رەتتە تىلشىلەر ازيم احماديمەن بايلانىسىپ، ونىڭ جيەنىمەن قالاي حابارالاسۋعا بولاتىنىن ءبىلىپ العان.
ارتىنشا ولار مۋرتازانىڭ اكەسى اريف احماديمەن بايلانىسقان كەزدە اۋعان شارۋاسى سۋرەتتەگى بالانىڭ راسىندا ۇلى ەكەندىگىن ايتقان. اريفتىڭ ايتۋىنشا، پلاستيك پاكەتتەن مەسسيدىڭ فۋتبولكاسىن جاساۋ يدەياسى ونىڭ ۇلكەن ۇلى حۋمايۋننىڭ ويىنا كەلگەن.
حۋمايۋن «فۋتبولكانى» ىنىسىنە كيگىزىپ، سۋرەتكە تۇسىرگەن سوڭ Facebook-كە شىعارعان. مۋرتازانىڭ اكەسى 5 جاسار ۇلىنىڭ فۋتبولعا دەگەن سۇيىسپەنشىلىگى ارقىلى بۇكىل الەمگە تانىمال بولعاندىعى ءۇشىن ءوزىن «باقىتتى سەزىنەتىنىن» دە جاسىرماپتى.
الايدا «جۇرت نازارىن وزىنە اۋدارتقان سۋرەتتەگى مەنمىن» دەگەن تاعى ءبىر بالا يراكتىڭ كۇردىستان ايماعىنان تابىلدى.
ونىڭ اتى حومين بولىپ شىقتى. ءتىپتى، مۇنى ەستىگەن جەرگىلىكتى ارنا تىلشىلەرى حوميننەن ارنايى سۇحبات الۋ ءۇشىن ۇيىنە جەتىپ بارىپ، وعان «بارسەلونانىڭ» قويۋ قىزىل-كوك جولاقتى فۋتبولكاسىن تىكەلەي ەفيردە سىيلاعان.
ءبىراق، بۇل جاڭالىقتى ەستىگەن عالامتورداعى قاۋىم حوميننىڭ تاپ سول بالاقاي ەكەندىگىنە زور ءشۇبا كەلتىردى. ولاردىڭ جەلىدە جازىپ قالدىرعان پىكىرلەرىنە سايكەس، «سۋرەتتەگى مەسسي جانكۇيەرى مەن حوميننىڭ قۇلاق پىشىندەرى مۇلدە ۇقسامايدى» ەكەن.
www.24.kz