قىتاي ۋكراينا ارقىلى وتەتىن «جىبەك جولىن» سالۋ باستاماسىن قولدايدى

استانا. قازاقپارات - ۋكراينا قىتايدان رەسەيدى اينالا تاۋار تاسىمالدايتىن «جىبەك جولىنىڭ» جاڭا باعىتىن سالۋ باستاماسىن كوتەرگەنى بەلگىلى.

رەسمي بەيجىڭ مۇنى قولدايتىنىن اشىق اڭعارتتى. بۇل تۋرالى ت ا س س اگەنتتىگى قىتاي سىرتقى ىستەر مينيسترلىگىنىڭ رەسمي وكىلىنە سىلتەمە جاساپ حابارلادى.

بولاشاق كۇرە جول قازاقستان، ءازىربايجان، گرۋزيا مەن ۋكراينانى كەسىپ ءوتىپ، «جىبەك جەل» دەگەن اتاۋعا يە بولادى دەگەن بولجام ايتىلۋدا. سوڭعى پۋنكت - ودەسسانىڭ تەڭىز پورتى.

قىتايدان ەۋروپاعا جول اشاتىن جاڭا باعىت - نەبارى 9 كۇندىك جول. ال رەسەي ارقىلى جاتقان جول - 30 كۇندىك. 14- قاڭتار كۇنى اتالعان مەملەكەتتەردىڭ وكىلدەرى جينالىپ، ءدالىز ارقىلى جۇك تاسىمالىنىڭ جەڭىلدەتىلگەن تاريفتەرىن ناقتىلادى.

ايتا كەتەيىك، ورتالىق جانە وڭتۇستىك ازيانى ەۋروپامەن جالعايتىن «جىبەك جولىن» سالۋ باستاماسى قىتاي باسشىسى شي جينپيڭنىڭ 2013-جىلى قازاقستانعا ساپارى كەزىندە كوتەرىلدى.