الماتىدا يگەرىلمەي قالعان جەر ۋچاسكەلەرى اۋكتسيونعا شىعارىلادى
بۇل تۋرالى بۇگىن استانادا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا الماتى اكىمى باۋىرجان بايبەك ءمالىم ەتتى.
ونىڭ ءسوزى بويىنشا، الماتىدا 400 گەكتار بولاتىن 605 جەر ۋچاسكەسى پايدالانىلماي جاتىر.
«جەر ماسەلەسى وتە وزەكتى. ول قالانىڭ ۇلكەن ينۆەستيتسيالىق قورى. ءبىز ۇلكەن ريەۆيزيا جاساپ، بۇگىندە قولدانىلماي جاتقان 400 گەكتار اۋماقتى الىپ جاتقان 605 جەر ۋچاسكەسىن انىقتادىق. ولارعا ۋاقىت بەرىلەدى. ەگەر ءبىر جىل كولەمىندە ماقساتىنا ساي پايدالانىلماسا، ولار اۋكتسيونعا ساتىلىمعا شىعارىلادى»، - دەدى ب. بايبەك.
بايبەكتىڭ اتاپ وتكەنىندەي، باستى ماقسات جەردى تارتىپ الۋ ەمەس، ونى اينالىمعا ەنگىزۋ.
«ءبىزدىڭ ءتيىستى قۇزىرلى ورگاندار ايتىپ وتىر، جەردى يگەرۋ قاجەت. ەگەر نىسان قۇر تۇرسا، جوبامەن بىرگە كەلىپ، قالالىق كەڭەستەن ءوتۋ قاجەت، پروتسەدۋرالاردىڭ بارلىعىن اتقارۋ كەرەك، سول كەزدە ءبىر جىلدىڭ ىشىندە ول جەرگە سالىنعان ۋاقىتشا شەكتەۋ الىنىپ تاستالادى»، - دەدى ول.
الماتى اكىمىنىڭ ءسوزى بويىنشا، وسىنداي شەشىمدەر ارقىلى قالادا قۇرىلىستى ىنتالاندىرىپ، جاڭا جۇمىس ورىندارىن اشۋعا جاعداي جاسالۋى ءتيىس.