قازاقستان مەن رەسەي كومپانيالارى بىرلەسكەن كاسىپورىن قۇرۋعا نيەتتى

استانا. قازاقپارات - رەسەي ساۋدا پالاتاسىنىڭ باستاماسىمەن «رەسەي-قازاقستان ينۆەستيتسيالىق ديالوگ: ىنتىماقتاستىقتىڭ جاڭا مۇمكىندىكتەرى» اتتى تاقىرىپتا دوڭگەلەك ۇستەل جيىنى وتكىزىلمەك.

شارا اياسىندا قازاقستان-رەسەي ىسكەرلىك كەڭەسىنىڭ ينۆەستيتسيالىق ىنتىماقتاستىقتى دامىتۋ جونىندەگى جۇمىس توبىنىڭ وتىرىسى دا وتەتىن بولادى. بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ باسپا ءسوز قىزمەتىنەن حابارلاندى.

«شارانىڭ ماقساتى قازاقستان مەن رەسەي كومپانيالارى اراسىندا ەكىجاقتى ينۆەستيتسيالىق بايلانىستى ورناتۋعا جامدەمدەسۋ بولىپ تابىلادى. وسىنىڭ ارقاسىندا بىرلەسكەن كاسىپورىندار قۇرۋ ماسەلەلەرى دە تالقىلانباق. جيىن اياسىندا ەۋرازيالىق ەكونوميكالىق وداق اياسىنداعى قازاقستاندىق- رەسەيلىك ينۆەستيتسيالىق ىنتىماقتاستىقتىڭ نەگىزگى باعىتى، بىرلەسكەن جوبالاردى جۇزەگە اسىرۋداعى پروبلەمالار، ەكى ەلدىڭ شەكارا ماڭىنداعى ەكونوميكالىق ىنتىماقتاستىعىن دامىتۋ ماسەلەلەرى قارالادى. بۇدان بولەك، قاتىسۋشىلار مەملەكەتتىك-جەكەشەلىك ارىپتەستىك تەتىكتەرىن پايدالانۋ ارقىلى بىرلەسكەن ينفراقۇرىلىمدىق جوبالاردى جۇزەگە اسىرۋدىڭ پەرسپەكتيۆالارىن اڭگىمەگە ارقاۋ ەتپەك. ينۆەستيتسيالىق ديالوگ بارىسىندا ىقتيمال ينۆەستورلارعا، قازاقستاندىق ينۆەستيتسيالىق جوبالار ارىپتەستەرىنە ارنالعان تۇساۋ كەسۋلەر وتكىزىلەدى»، - دەلىنگەن باسپا ءسوز بايانىندا.

قازاقستاندىق دەلەگاتسيا قۇرامىندا مەملەكەتتىك ورگان وكىلدەرى، «اتامەكەن» ۇ ك پ، «Kaznex Invest» ۇ ك وكىلدەرى باراتىن بولادى.

ال ىسكەرلىك كەڭەس جۇمىس توبىنىڭ وتىرىسى اياسىندا اعاش وڭدەۋ، مەتاللۋرگيا، قۇرىلىس، قوناق ءۇي بيزنەسى، وڭدەۋ ونەركاسىبى سەكىلدى سالالارداعى قازاقستاننىڭ 11 ينۆەستيتسيالىق جوباسى تانىستىرىلماق.

اۆتور: قانات مامەتقازى ۇلى