ولارعا 30 مىڭعا العان يۋبكاسىن لەگاليزاتسيالاۋدىڭ قاجەتى جوق. ءبىراق ولار سول 30 مىڭدى سۋبسيدياعا المايدى، ءوزى تاپقان اقشاعا الادى.
ولار ءۇشىن كەشكى استى ءبىر يوگۋرت پەن بانانمەن الماستىرۋ پروبلەما ەمەس. ءبىراق سۋپەرماركەتتەن العان ءبىر اربا دۇنيەنى جەتكىزۋ پروبلەما. كۇنى بويى جۇمىس، ءۇي تىرلىگىمەن اينالىسىپ، سىلەسى قاتقان ايەلدىڭ تۇنگە قاراي «باس اۋىرۋ سيندرومى» وعان پروبلەما ەمەس. ءبىراق سول پروبلەمانىڭ جوق بولۋى كەيدە پروبلەما... كەرەكينفو سايتى كەڭىرەك توقتالادى.
وسىنداي «اۋزى كۇيىپ، ءۇرىپ ىشەتىن» ايەلدەن ەكسارىپتەستەرىنە ايتار اقىلى بار.
1. سەنىم ارتا ءبىل.
كۇيەۋىڭە قۇدايداي سەن. سەنە الماساڭ، ءوزىڭدى الداي ءبىل. سلەپاكوۆ جىرلاعانداي «بارلىق ەركەكتەر. ءابسوليۋتتى. ۇدايى. ايەلدەرىنىڭ كوزىنە ءشوپ سالادى» . ءبىراق، تەك سەنىڭ كۇيەۋىڭ ونداي ەمەس. وسىعان سەن. سوتكاسىنداعى قوڭىراۋلارعا، حابارلامالارىنا ۇڭىلمە. الەۋمەتتىك جەلىسىنە ەكىباستان. ءيا، كەشكى توعىز- ونعا قاراي تەك سەنىڭ كۇيەۋىڭدى جۇمىسقا شاقىرادى. قايتەسىڭ ەندى، ودان باسقا بىلىكتى مامان جوق. ءبارى بالا- شاعانىڭ قامى. ايتپەسە جىنى بار ما ءتۇن ىشىندە جۇمىسقا بارىپ. سەنە الماساڭ ءوز وبالىڭ وزىڭە. قۇدايعا سەنبەيتىندەردىڭ باراتىن جەرىن ءوزىڭىز بىلەسىز.
2. كۇتىن.
ەركەكتەر نەگە تىستاعى ايەلدەرگە كوز سالادى؟ بۇرىنعى ءولىپ- وشكەن سەزىم قايدا كەتكەن؟ نەگە كۇيەۋىڭ ساعان ەمەس، الەم- جالەم بوپ بويانعان كورشى ايەلگە سۇقتانا قارايدى. ويتكەنى ول قاشان كورسە دە ادەمى، كۇتىنگەن كۇيدە جۇرەدى. ونى كۇيەۋىڭ تىزەسى شىققان تريكومەن، سوزىلىپ، بوياۋى وڭىپ كەتكەن فۋتبولكامەن، ماي- ماي شاشىمەن كورگەن جوق. ارينە، جان دۇنيەڭ سەنىكى وعان قاراعاندا ءۇش جارىم ەسە باي شىعار. ءبىراق جان سۇلۋلىعىنا ەركەك اتاۋلى قالپاعىن عانا شەشەدى.
3. قىزىقتى بول.
ال، كۇيەۋىڭ كەشكە دوستارىمەن فۋتبولعا بارمادى، تۇنگە قاراي شاقىرعان ارىپتەستەرىنە دە بارمادى. و مادوننا، ينتەرنەت تە جوق. تەلەديدارعا دا، سوتكاسىنا دا تەلمىرمەدى. ءسويتىپ كۇيەۋىڭمەن كوممۋنيكاتسيا مۇمكىندىگى تۋىندادى. نە ايتاسىڭ؟ اتا- انالار جينالىسىنان حابارلاندىرۋ، كورشى- قولاڭ، تۋعان- تۋىستىڭ سوڭعى وسەكتەرى، جۇمىستاعى قاتىن- قالاشتىڭ ساتىپ العان دۇنيە- مۇلكى، الەۋمەتتىك جەلىدەگى كۇيەۋىڭ ونسىز دا كورىپ وتىرعان اڭگىمەلەرى، ... ىى... ودان باسقا نە ايتاسىڭ؟ قىزىقتى اڭگىمە ايتۋ ءۇشىن، ءوزىڭ ءبىر نارسەگە قىزىق. يوگا، بيسەر توقۋ، تاعىسىن تاعىلار. تىم بولماسا، كينو تۋرالى اڭگىمە قۇرىڭىز. دورامدار ەمەس، البەتتە.
4. وزگەرتۋگە تىرىسپا.
بۇكىردى تەك تابىت تۇزەتەدى. شۋرۋپتى نىعىزداۋ ءۇشىن بۇراعان سايىن ءتۇبى كەڭي تۇسەدى. ەركەكتى قاجاعان سايىن ەتى ولە بەرەدى. ارى قاراي ءوزىڭ دە جالعاستىرا الاسىڭ. نەگىزدى ءمورالدى تۇسىنگەن بولارسىڭ - ىزىڭداۋدىڭ ماعىناسى دا قاجەتى دە جوق. بىلەسىڭ بە، ۇنەمەي قويعاننىڭ سالماعى ۇرىس- كەرىستەن الدەقايدا باسىمىراق.
5. وزگەنىڭ ەمەس، ءوز ارتىقشىلىعىڭدى كورە ءبىل.
ءبىر قۇربىم بار ەدى. ءالى دا بار، قۇداي ءومىرىن كوپ كورمەسىن. كۇيەۋى ناقۇرىستىڭ ناق ءوزى. ايەلىن تالاي رەت ساباپ، ءولىمشى ەتە جازداعان. ءتىپتى بىرنەشە جىل بۇرىن ساباپ، كوگەرتكەن ىزدەرى ءالى بار. ول دا اجىراسىپ، بوستاندىق ءدامىن تاتا جازداعان. ءبىراق ەكى بالاسىنىڭ ارتىنان ءۇشىنشىسى كەلىپ، انا- ەنەسى جىلاپ ءجۇرىپ، كۇيەۋىنە قايتا ورالدى. كۇيەۋى ساباۋىن قوعان جوق. بىردە قوناققا بارعاندا سۇرادى اجىراسقان قالاي ەكەن دەپ. كوزىندەگى مۇڭدى كورىپ زارلاي جونەلدىم. «القاش بولسا دا، جىندى بولسا دا كۇيەۋىڭ بار. جالعىز جاتىپ، جالعىز ويانعان قانداي جامان ەكەنىن بىلسەڭ عوي» دەگەن سىڭايلى. الگى قۇربىم كادىمگىدەي باقىتتى سەزىنە باستادى. شۇكىر، باسىمىز امان، باۋىرىمىز ءبۇتىن دەپ قويادى. ايتايىن دەگەنىم، تىرناعا شالشىق بولىپ كورىنگەن سۋ، باقاعا تەڭىزدەي كورىنەر. باستىسى ءوز باقىتىڭدى كورە ءبىلۋ.
6. قۇرمەتتە.
ساعان جامان شالىڭ بولسا دا، باسقالارعا مىرزا بولۋى مۇمكىن. ەلدىڭ الدىندا «وسىنىڭ قولىنان نە كەلۋشى ەدى، وسىنى ادام قىلعان مەن» دەگەن اڭگىمەلەردى ەشقاشان ايتپاعانىڭ ءجون. ءتىپتى سولاي بولعان كۇننىڭ وزىندە. جالپى، مۇنداي اڭگىمە ايتقان ايەل ەلگە جەكسۇرىن، ال ونىڭ كۇيەۋى بەيشاراعا اينالادى. نەگىزى ۇيلەنگەنگە دەيىنگى ء«سىز- ءبىز» قاتىناسىن مەيىلىنشە ۇزاققا سوزۋعا تىرىس.
7. مىقتى جانە ءالسىز بولاتىن جەردى شاتاستىرما.
شارۋاعا مىقتى بول. ءبىراق بالتامەن اعاش جارىپ، ەلەكتر قۇرالدارىن جوندەۋ مۇلدەم باسقا ستيحيا. ءتىپتى ەلەكتر شامى جانىپ كەتسە دە، ول سەنىڭ ارالاساتىن شارۋاڭ ەمەس. سەنىڭ شابۋىل الاڭىڭ - اس ءۇي. قارۋىڭ - ءدامدى تاعام، تاپ- تۇيناقتاي ءۇي، سۇيكىمدى بالالار، سىرباز كۇيەۋ. ەرلەردىڭ ىسىنە ارالاسقان سايىن، نازىكتىكتەن ايىرىلا بەرەسىڭ. ال ەركەكتەر كۇشتى ايەلدەردىڭ جانىندا جىلدام بوساڭسىپ، كەرجالقاۋعا اينالادى. نەگىزى ءقازىر ەسى دۇرىس ناعىز ەركەكتەر از دەيدى. وعان كىنالى ءوزىمىز.
8. رومانتيك بول.
قيالي بول. ەركە بول. نازدى بول. ەركەكتەرگە سۇلۋ ايەلدەن گورى نازدى ايەل ۇنامدىراق مىس. بۇرىنعى كەرەمەت ساتتەر ەسىڭدە مە؟ سولاردى جاڭعىرت. كۇيەۋىڭنىڭ دە ەسىنە سال. تەك ادەمىلەپ. بۇل تۇرمىس جەڭگەن سانانى از بولسا دا تىرىلتەدى. ايتپاقشى، ەگەر پەردەلەر ەسكىرىپ، اقشا تەك ادەمى داستارقانعا جەتسە، ويلانباي بىردەن ادەمى ىشكيىم ال. ايتتىم عوي رومانتيك قيالي بول دەپ.
9. كونسەرۆاتور بولما.
تۇسىنەمىن. كۇنى بويى جۇمىستاعىلار جۇيكەڭىزگە ءتيدى. جۇگىرىپ ءجۇرىپ بالالاردى ساباعىنان الىپ، ۇيىرمەسىنە اپاراسىز. ۇيگە كەلىپ تاماق جاسايسىز. ساباعىن ءبىر مەزەتتە وقىتىپ، كيىمدەرىن رەتتەيسىڭ. ولاردى تاماققا شاقىرىپ، وتىرعىزۋدىڭ وزىنە قانشا كۇش كەتەدى. سەريال كورەتىن ايەلدەر دەپ قاي اقىماق ايتتى ەكەن. تەزىرەك ىدىستاردى جۋىپ، ءاسۇيدى جيناپ، جاتا قالسام سونىڭ ءوزى باقىت. تاڭەرتەڭ ەرتە تۇرىپ يت تىرلىككە قايتا كىرىسۋ كەرەك. ال جۇبايلار قىزىعى شە؟ وتىزعا قاراي ەرىڭ قىزىقتىرماي، ءلاززات مىندەتكە اينالا باستاسا، بۇعان ەڭ الدىمەن كىنالى ءوزىڭ. قىزىعى باسىلسا، ىستىعى قايتا باستاسا، امالدار ىزدە، جاڭالىق ەنگىز. «جامان قىز» بولۋدىڭ ەش ايىبى جوق. ايىبى بولسا، «جازاسىن» الۋدان دا قاشپا . تەك كونسەرۆاتور بولا كورمە.
10. بوتەن ايەلدىڭ اقىلىنا قۇلاق تۇرمە. ءتىپتى مەنىڭ دە. ءار ايەلدىڭ ءوز باسى، ميى، جۇرەگى بولۋى ءتيىس. وتباسى ەڭ باستى قۇندىلىق. ساقتاۋعا تىرىس. بار كۇشىڭمەن.
دەرەككوز: Nur.kz