استانادا ەڭ كوپ ساتىلعان كولىكتىڭ ءنومىرى

بۇل تۋرالى قازاقپارات تىلشىسىنە استانا قالاسى ءى ءى د اكىمشىلىك پوليتسيا باسقارماسىنىڭ تىركەۋ- ەمتيحان قابىلداۋ جۇمىستارى جونىندەگى ءبولىم باسشىسىنىڭ ورىنباسارى ەلدار دانياروۆ حابارلادى.

ونىڭ ايتۋىنشا، ەلوردالىق كولىك يەلەرىنىڭ كوبى «001» مەملەكەتتىك تىركەۋ نومىرىنە قىزىعادى.

«استانا قالالىق ىشكى ىستەر دەپارتامەنتىنىڭ اكىمشىلىك پوليتسيا باسقارماسىنىڭ مالىمەتىنە سۇيەنسەك، 2015 -جىلى استانا قالاسىندا جالپى سوماسى 430,5 ميلليون تەڭگە كولەمىندە 1 241 مەملەكەتتىك تىركەۋ ءنومىرى ساتىلعان»، - دەپ ءتۇسىندىردى ول.

اكىمشىلىك پوليتسيا باسقارماسىنىڭ دەرەگىنە سۇيەنسەك، ەلورداداعى كولىك يەلەرىنىڭ اراسىندا سۇرانىسقا يە VIP- نومىرلەر - ول «001»، «111»، «777».

ناقتىراق ايتساق، 2015 -جىلى استانادا 240 كولىك يەسى «001» مەملەكەتتىك تىركەۋ ءنومىرىن، 186 كولىك يەسى - «111» ءنومىرىن، 137 ادام - «777» ءنومىرىن، 117 ادام «555» مەملەكەتتىك تىركەۋ ءنومىرىن ساتىپ العان. سونىمەن قاتار، بىلتىر «007» ءنومىرى 82 ادامعا، «100» كومبيناتسياسى - 84 ادامعا، «888» كومبيناتسياسى - 99 كولىك يەسىنە، «999» كومبيناتسياسى - 72 جۇرگىزۋشىگە ساتىلعان.

اكىمشىلىك پوليتسيا 2016 -جىلعا قاتىستى دەرەگىن ءالى جاريا ەتكەن جوق.