تەمەكى شەگۋدى تاستاعان ادامدار سەمىرە مە؟
البەتتە، وسى ءبىر زياندى ادەتىنەن ارىلعان، ياعني تەمەكى شەگۋدى تاستاعان ادام كوبىنەسە سالماق قوسادى دەگەن تۇجىرىم شىلىمقورلاردى عانا ەمەس، عالىمداردى دا بۇرىننان قىزىقتىرىپ كەلەدى.
Chest جۋرنالىندا جاريالانعان ا ق ش عالىمدارىنىڭ زەرتتەۋلەرىنە جۇگىنسەك، شىلىم اعزاعا جينالعان مايدى ىدىراتىپ وتىراتىن گەننىڭ بەلسەندىلىگىن ارتتىرادى ەكەن. تەمەكى شەگۋدى تاستاعان ادامنىڭ تابەتى جوعارىلاپ، مەتوبوليزم دەڭگەيى تومەندەي تۇسەتىن كورىنەدى. ادەتتە مەتوبوليزمنىڭ جەدەل بولۋىنا نيكوتين اسەر ەتەتىن.
سونىمەن قاتار، شىلىم شەگۋ جانە سالماقتىڭ بايلانىسى مولەكۋليارلىق نەگىزگە يە، دالىرەك ايتاتىن بولساق، شىلىم شەگۋ كەزىندە AZGP1 گەنىنىڭ بەلسەندىلىگى ارتادى. تىشقاندارعا جاسالعان زەرتتەۋلەر ناتيجەسىندە، بۇل گەن ولاردىڭ ماي مولشەرىن رەتتەپ وتىراتىنى انىقتالعان.
دەي تۇرا، تەمەكى ارىقتاۋدىڭ جولى ەمەس. عالىمداردىڭ پىكىرىنشە، شىلىم شەگۋ مەن سالماقتىڭ ارا-قاتىناسى الدەقايدا كۇردەلى، جانە بۇل ۇدەرىسكە تاماقتانۋ جانە فيزيكالىق بەلسەندىلىك سياقتى كوپتەگەن فاكتورلار اسەر ەتەدى.
jas.kz