اقتاۋدا جۇكتى كەلىنشەكتەرگە ارنالعان كيىمدەر تىگەتىن سەح دامىپ كەلەدى

استانا. قازاقپارات - اقتاۋداعى «داريا» سەحىنىڭ ونىمدەرىنە دەگەن سۇرانىس كۇننەن كۇنگە ارتىپ كەلەدى. ىسكەر ايەل اسەل جەكەنوۆا بىرنەشە قالادان دۇكەندەر جەلىسىن اشتى،

 دەپ حابارلادى 24.kz.

بولاشاق انالارعا ارنالعان كيىمدەردىڭ بارلىعى امبەباپ. ءارقايسىسىندا سانگەردىڭ قولتاڭباسى جاتىر. «ءداريا» برەندىنىڭ ومىرگە كەلۋىنە اسەل جەكەنوۆانىڭ جۇكتىلىگى تۇرتكى بولىپتى. كيىم تاڭداۋدا تالاي ماشاقاتتى باستان وتكىزگەن كەلىنشەك بولاشاق انالارعا ارنالعان كويلەكتەر تىگۋدى قولعا الادى. 12 ادامدى جۇمىسپەن قامتىعان وتاندىق ءوندىرىستىڭ ءورىسى كەڭەيۋدە.

«بولاشاق انالارعا ارنالعان كيىمدەردىڭ ەرەكشەلىگى بار. سۇرانىس بويىنشا تىزەدەن ۇزىنىراق كويلەكتەردى تىگەمىز جانە قولدارى كىشكەنە جابىقتاۋ، موداعا ساي اشىق ءتۇستى كيىمدەردى شىعارامىز. 2015 - جىلى ەكى كوللەكسيا شىعاردىق: جازعى جانە قىسقى. بولاشاق انالاردان جاقسى سۇرانىس بولدى»، - دەدى اسەل جەكەنوۆا.

سەحتا ايىنا 200-گە جۋىق ءونىم تىگىلەدى. كويلەكتەر مەن جەيدەلەر، شالبارلار مەن بەلدەمشەلەر بارلىعى دا بولاشاق انالار ءۇشىن. جۇكتى ايەلدەر جاستاناتىن ارنايى جاستىقتار مەن بالا ەمىزۋگە قاجەتتى توپتاما ساتىلىمدا كوش باستاپ تۇر.

ءبىر جىل بۇرىن دۇنيەگە كەلگەن وتاندىق برەندتىڭ جەتكەن جەتىستىگى جەتەرلىك. اتىراۋ جانە اقتوبە قالالارىندا دۇكەندەر جەلىسى بار. اسەلدىڭ جازعى كيىمدەر توپتاماسى «ءسان مەن ساحنا» حالىقارالىق ءسان بايقاۋىندا ەكىنشى ورىنعا يە بولعان. ول كەلەشەكتە ءسانقوي قىزدار مەن بالالارعا ارنالعان كيىمدەر تىگۋدى قولعا الماق، دەپ جازدى 24.kz.