بوكس: قىزىلجاردان ۇشقان قىران - جانات جاقيانوۆ
قازاق جانكۇيەرلەرى گەنانى ءوز باۋىرىنداي كورىپ كەتكەلى قاشان؟! گەنا بۇگىن قۇرلىقتىڭ ارعى بەتىندە ايقاسقا شىعادى دەسە، ءتۇن ۇيقىسىن ءتورت ءبولىپ، سول جەكپە- جەكتى كورۋگە اسىقپايتىن ادامدار كەمدە- كەم. ونىڭ بۇگىنگە دەيىنگى باعىندىرعان بيىكتەرى مەن جەتكەن جەتىستىكتەرىن ەڭبەكتەگەن بالادان ەڭكەيگەن قارياعا دەيىن جاتقا بىلەدى دەسەك ارتىق ايتقانىمىز ەمەس.
ءبىراق، گەنا كاسىپقوي بوكستا قازاق ەلىنىڭ اتىنان شىعىپ جۇرگەن جالعىز بوكسشى ەمەس. ونىڭ ارتىنان ءىزىن باسىپ، وكشەلەپ كەلە جاتقان جاس تالانتتار دا جەتەرلىك. سولاردىڭ ءبىرى ەل نازارىندا كوپ بولا بەرمەيتىن، الايدا ءبىراز بيىكتەردى باعىندىرىپ ۇلگەرگەن پەتروپاۆلدىق كاسىپقوي بوكسشى - جانات جاقيانوۆ. ءبىز بۇگىن جانات تۋرالى كەڭىنەن توقتالعاندى ءجون كورىپ وتىرمىز.
جاقيانوۆ - وتكەن جىلى قازاق سپورتشىلارىنىڭ ىشىندەگى ءوز مىندەتىن ابىرويمەن اتقارعان سپورتشىنىڭ ءبىرى دەپ ايتۋعا تولىق نەگىز بار. سەبەبى، ول وتكەن جىلى كاسىپقوي بوكستان WBA نۇسقاسى بويىنشا جەڭىل سالماقتاعى ۋاقىتشا الەم چەمپيونى اتاعىن جەڭىپ الدى. ول بۇل اتاققا وتكەن جىلى مونتە- كارلودا وتكەن 12 راۋندتىق جەكپە- جەكتە قول جەتكىزدى. قارسىلاسى WBA (Interim) تۇجىرىمى بويىنشا الەم چەمپيونى ۆەنەسۋەلالىق يونفرەس پارەحون (17-1-1, 8 ك و) بولاتىن. سونداي- اق، قازاقتىڭ كاسىپقوي بوكسشىسى وتكەن جىلى WBC تۇجىرىمىنىڭ جاڭارتىلعان رەيتىنگىندە تايلاند تارلانبوزى سۋريان سور رۋنگۆيسايدى باسىپ وزىپ، بۇكىل الەمدىك بوكس كەڭەسى (WBC) تۇجىرىمى بويىنشا الەم چەمپيونى اتاعىنا تالاسۋدان ۇمىتكەرلەر اراسىندا ءبىرىنشى ورىنعا شىقتى. مۇنىڭ ءوزى قازاق بوكسشىسىنىڭ كاسىپقوي بوكس الەمىندەگى ورنىن ايقىنداي ءتۇستى.
ەستەرىڭىزدە بولسا، وتكەن جىلى ءساۋىر ايىنىڭ سوڭىندا جانات جاقيانوۆ EBU تۇجىرىمى بويىنشا جەڭىل سالماقتا (53,5 كەلىگە دەيىنگى) ەۋروپا چەمپيونى اتاعىن دا جەڭىپ العان بولاتىن. وسى چەمپيوندىق اتاق ءۇشىن وتكەن جەكپە- جەكتە قازاقستان بوكسشىسى فرانسۋز كاريم گۋەرفيدى نوكاۋتقا تۇسىرگەن.
ايتا كەتەيىك، ZZ لاقاپ اتىمەن ونەر كورسەتىپ جۇرگەن جەرلەسىمىز جەڭىل سالماقتا WBC Eurasia Pacific Boxing Council اتاعىنىڭ جەڭىمپازى. ەندى جانات بيىلعى، 2016 - جىلعى العاشقى جەكپە- جەگىن كوكتەم ايلارىندا وتكىزۋدى جوسپارلاپ وتىر.
جانات كاسىپقوي بوكسقا 2007 - جىلى بەت بۇرعان بولاتىن. سودان قازىرگى ۋاقىتقا دەيىن 27 كەزدەسۋ وتكىزىپ، 26 رەت جەڭىسكە قول جەتكىزدى. ونىڭ 18- ءىن مەرزىمىنەن بۇرىن اياقتادى. ول وتكەن جىلدىڭ 7 - قاراشاسىندا ۆەنەسۋەلالىق يونفرەز پارەحونى ۇپاي سانىمەن ۇتىپ، ۋاقىتشا الەم چەمپيونى اتاعىنا قول جەتكىزدى.
بۇل كۇندەرى جاقيانوۆ كەزىندەگى ۇلى بريتانيانىڭ اتاقتى بوكسشىسى ريككي حاتتوننىڭ قولاستىندا جاتتىعۋدا.
قازىرگى كەزدە جانات جاقيانوۆتىڭ كومانداسى ۇلى بريتانيانىڭ بەلدى بوكسشىلارىنىڭ ءبىرى، WBA نۇسقاسىنىڭ تولىققاندى چەمپيونى دجەيمي ماكدوننەلمەن كەلىسسوزدەر جۇرگىزۋدە. بۇل جىگىتتىڭ دە ءجۇرىپ وتكەن جولى جارقىن جەڭىستەرگە تولى. 29 جاستاعى دجەيمي 2005 - جىلدان بەرى كاسىپقويلارمەن كۇش سىناسىپ ءجۇر. سول كەزدەن بەرى 30 رەت رينگكە كوتەرىلىپ، 27 رەت جەڭىسكە جەتتى. 12 قارسىلاسىن نوكاۋتقا جىبەردى. 2 رەت ۇتىلىپ، تاعى 1 باسەكەدە تەڭ ەسەپ تىركەلدى. بۇل كۇندەرى اتالمىش نۇسقا بويىنشا التىن بەلبەۋ ءدال وسى ماكدوننەلگە تيەسىلى.
جانات جاقيانوۆ تۋرالى جالپى ماعۇلمات:
تولىق ەسىمى: جانات ەسكەندىر ۇلى جاقيانوۆ
لاقاپ اتى: ZZ
ازاماتتىعى: قازاقستان
تۋعان كۇنى: 4 - قاراشا 1983 (32 جاس)
تۋعان جەرى: پەتروپاۆل
تۇرعىلىقتى جەرى: پەتروپاۆل
سالماعى: اسا جەڭىل سالماق (53,5 كەلى)
تۇرىسى: وڭقاي
بويى: 170 س م
باپكەرى: ريككي حاتتون
كومانداسى: Hatton promotions
كاسىبي كارەراسى
العاشقى ايقاسى: 3 - تامىز 2007 - جىل
سوڭعى ايقاسى: 7 - قاراشا 2015 - جىل
چەمپيون بەلدىگى: EBU، WBA interim
ايقاستار سانى: 26
جەڭگەندەر سانى: 25
نوكاۋتپەن جەڭگەنى: 18
جەڭىلگەندەر سانى: 1
مىنە، كاسىپقوي بوكستا ەل نامىسىن ابىرويمەن قورعاپ جۇرگەن بوكسشىلارىمىزدىڭ ءبىرى جاقيانوۆ تۋرالى تولىق مالىمەتتى نازارلارىڭىزعا ۇسىندىق. ەلىمىزدىڭ ءانۇرانىن شارىقتاتىپ، كوك تۋىمىزدى بيىكتە قالىقتاتىپ جۇرگەن باۋىرىمىزدىڭ الار اسۋى مەن باسار بەلەسى ءالى الدا ەكەنى انىق. قازاقتىڭ قايسار ۇلدارى اۋەسقوي بوكس شارشى الاڭدارىندا عانا الەمدى مويىنداتپاي، كاسىپقوي بوكس ارەنالارىندا دا ابىرويىمىزدى اسقاقتاتادى دەگەن ۇمىتتەمىز.
كۇنسۇلتان وتارباي