تولقۋدان سوڭ تۇتقىنداۋ باستالدى

13- قاڭتاردا فيزۋلي، اقسۋ، اگدجەبەردي، سيازان جانە لەنكوران اۋداندارىندا جۇزدەگەن ادام ازىق-تۇلىكتىڭ قىمباتتاۋىنا بايلانىستى شەرۋگە شىققان.

ازەربايجان ۇكىمەتى تولقۋدى باسۋ ءۇشىن سيازان اۋدانىنا اسكەر كىرگىزگەن. ءدال وسى اۋداندا ەڭ كوپ ادام تۇتقىندالدى. ىشكى ىستەر مينيسترلىگىنىڭ مالىمەتىنشە، ەل بويىنشا 55 ادام قاماۋعا تۇسكەن. پروكۋراتۋرا اباقتىعا قامالعانداردى «زاڭسىز شەرۋ وتكىزدى، پوليتسەيلەر مەن پوليتسيا كولىگىنە زاقىم كەلتىردى» دەپ ايىپتادى.

سيازانداعى دەمونسترانتتاردى تاراتۋ ءۇشىن قاۋىپسىزدىك كۇشتەرى جاس اعىزاتىن گاز قولدانعان. بيلىك «زاڭسىز جيىن وتكىزۋگە شاقىردى» دەپ AXCP جانە مۋساۆات پارتيالارىن كىنالى ەتىپ كورسەتتى. قامالعانداردىڭ ىشىندە وسى پارتيانىڭ جەتەكشىلەرى نازيم حاسانلى مەن يمان اليەۆ تە بار.

ازاتتىقتىڭ ازەربايجان قىزمەتى AXCP پارتياسىنىڭ جاس بەلسەندىسى تۋران يبراحيم 13- قاڭتاردا باكۋدە تۇتقىندالدى دەپ حابارلادى.

ءبىر اي بۇرىن ازەربايجاننىڭ ۇلتتىق ۆاليۋتاسى مانات كۇرت قۇنسىزدانىپ، ەلدىڭ ەكونوميكاسى السىرەي تۇسكەن ەدى. باكۋدىڭ نەگىزگى تابىس كوزى مۇناي ەكسپورتى بولىپ سانالادى.