وسىنىڭ ءبارى «اقپاراتتاندىرۋ تۋرالى» ق ر زاڭىنىڭ ارقاسىندا مۇمكىن بولىپ وتىر. ەل ىشىندە موبيل تەلەفون نومەرىن ساقتاي وتىرىپ وپەراتور اۋىستىرۋ مۇمكىندىگى «موبيل قۇلدىقتان» قۇتىلۋ دەپ اتالىپ كەتتى.
بۇرىنعى وپەراتوردا قالعان بالانستى الا كوشۋگە بولا ما؟
جوق. الدىمەن بالانسىڭىزدا قالعان قاراجاتتى قايتارىپ بەرۋىن ءوتىنىپ، بۇرىنعى وپەراتورىڭىزعا جۇگىنۋ كەرەك. تەك، Kcell مەن Activ اراسىندا كوشكەن جاعدايدا عانا بالانسىڭىزدى الا كەتۋگە مۇمكىندىك بار.
موبيل بايلانىس وپەراتورىن قانشالىقتى ءجيى اۋىستىرۋعا بولادى؟
بيىلشا ۇيالى بايلانىس وپەراتورلارى اراسىندا الپىس كۇندە ءبىر رەت قانا كوشۋگە بولادى. كەيىننەن بۇل ارەكەتتى اي سايىن جاسايمىن دەسەڭىز دە ءوز ەركىڭىزدە. قىزمەت - تەگىن.
باسقا وپەراتورعا قالاي كوشەمىن؟
موبيل بايلانىس وپەراتورىن اۋىستىرۋ ءۇشىن جەكە كۋالىگىڭىزدى الىپ، كوشكىڭىز كەلەتىن وپەراتوردىڭ قىزمەت كورسەتۋ ورتالىعىنا بارۋىڭىز كەرەك. كوشكىڭىز كەلەتىنىن ايتىپ ءوتىنىش جازاسىز. باسقا وپەراتورعا اۋىستىرعىڭىز كەلەتىن نومەر ءوز اتىڭىزدا بولۋى ءتيىس ەكەنىنە نازار اۋدارىڭىز. قىزمەت كورسەتۋ ورتالىعىندا جاڭا SIM- كارتا الاسىز. نومەردىڭ ءوزىن كوشىرۋگە بىرنەشە مينۋتتان ءتورت ساعاتقا دەيىن ۋاقىت كەتەدى.
كەيبىر وپەراتورلار الدىمەن ءوتىنىشتى قابىلداعانى، سودان كەيىن نومەردى كوشىرگەنى تۋرالى SMS جىبەرەتىنى بار.
وپەراتور اۋىستىرۋ ءۇشىن قىزمەت كورسەتۋ ورتالىعىنا بارۋ مىندەتتى مە؟
باسقا وپەراتورعا كوشۋ ءۇشىن ءوتىنىشتى ونلاين بەرۋگە بولادى:
Kcell, Activ Beeline, Tele2, Altel
سوندا دا، قۇجاتتارعا قول قويىپ، جاڭا SIM- كارتا الۋ ءۇشىن قىزمەت كورسەتۋ ورتالىعىنا ءبىر بارۋعا تۋرا كەلەدى.
ءبىر وپەراتوردان باسقاسىنا كوشۋىمە رۇقسات بەرمەي قويۋى مۇمكىن بە؟
نومەرىڭىزدى كوشىرۋگە بەس جاعداي كەدەرگى بولۋى مۇمكىن:
نومەر ءوز اتىڭىزعا تىركەلمەگەن بولسا.
تەكسەرۋ كەزىندە ۇيالى بايلانىس قىزمەتىنە قارىزىڭىز بار بولسا.
وپەراتور الدىندا ساتىپ العان ابونەنتتىك قۇرىلعى (مىسالى: تەلەفون، پلانشەت، ت. ب. ) بويىنشا شارتتى مىندەتتەمەلەرىڭىز بولسا.
نومەرىڭىزدى سوڭعى كوشىرگەلى بەرى 60 كۇن وتپەسە.
قۇقىق قورعاۋ ورگاندارىنىڭ تالاپ ەتۋىمەن نومەرگە بلوك سالىنعان بولسا.