موڭعولياداعى قازاقتار تۋرالى فيلم تۇسىرگەن تانىمال شەتەلدىك رەجيسسەر قازاق حالقىنىڭ مىقتىلىعىنا تاڭ قالدى
«موڭعوليا كوشپەندىلەرى» دەپ اتالاتىن فيلمدە باستى رولدەردى قازاقتار سومدايدى. كوشپەندى حالىقتىڭ قىزىق ءومىرىن باياندايتىن بۇل فيلم شەتەلدە كۇن ساناپ تانىمال بولۋدا.
وزگە ەل وكىلدەرى قازاقتاردىڭ ءومىرىن بايانداعان فيلمگە جوعارى باعاسىن بەرىپ، جارىسا ماقتاۋدا.
«جوبانى باستاماس بۇرىن مەن پروديۋسەرىم انسلەيدەن فيلم تۇسىرگەنگە الەمدەگى ەڭ كەرەمەت دۇنيەنى تاۋىپ بەرۋىن ءوتىندىم. ول ماعان بۇركىت اۋلاۋشى قازاقتار تۋرالى اقپارات جيناپ اكەلدى. مەن بۇعان بىردەن ءتانتى بولدىم»، - دەيدى برەندون لي.
برەندون كوشپەندى قازاقتارمەن بىرگە ءبىر اي بويى تۇرىپ، كوشپەندىلەردىڭ قيىن ءارى قىزىقتى ءومىرىنىڭ كۋاسى بولعان.
وسى ورايدا تانىمال رەجيسسەر، MTV- دىڭ بۇرىنعى پروديۋسەرى برەندون ليدەن شەتەلدىك The Plus جۋرنالىنىڭ العان قازاقتار تۋرالى سۇحباتىن نازارلارىڭىزعا ۇسىنامىز.
«قازاقتار اعىلشىنشا تۇسىنبەيتىندىكتەن، فيلمدى ءتۇسىرۋ وڭايعا سوقپادى. قاسىمدا اۋدارماشىم بولعاننىڭ وزىندە ءبىر-ءبىرىمىزدى تۇسىنبەي جاتقان كەزدەر بولدى»، - دەپ سۇحباتىن باستادى رەجيسسەر.
- موڭعولياداعى كوشپەندىلەردى تۇسىرۋگە كوپ شىعىن كەتتى مە؟
- National Geographic تەن قارجىلاي كومەك بولعانىمەن ءبىراز اقشانى ءوز قالتامنان شىعارۋعا تۋرا كەلدى. مەن پروديۋسەرىمە جانە وزىمە موڭعولياعا بيلەتتەر مەن ءبىر اي تۇرۋعا شىعىنداردى ءوزىم تولەدىم. اۋدارماشى مەن جۇرگىزۋشىگە دە ءوزىم شىعىنداندىم، بۇدان بولەك بىرنەشە جاڭا كامەرا ساتىپ العانىمدى ەسەپتەي بەرىڭىز.
- ولاردى تۇسىرۋگە مۇنشالىق قۇلشىنۋىڭىزعا نە سەبەپ بولدى؟
- ۋربانيزاتسيا(قالالانۋ - رەد.) سالدارىنان جوعالۋعا شاق قالعان مادەنيەتى. مەن ولاردىڭ ءالى بار ەكەنىن اڭداتاتىن تۋىندى جاساعىم كەلدى.
- ءسىزدىڭ فيلم تۇسىرۋدەگى ءستيلىڭىز قانداي بولدى؟
- مەن ءبارىن تابيعي ەتىپ كورسەتۋگە، جاساندى كادرلار بولماۋىنا ۇلكەن ءمان بەرەمىن. وسى ورايدا كوپ قيىندىقتارعا كەزىگەسىڭ. اسىرەسە ادامداردى كامەراعا قاراماۋعا جانە تاعى بىرنەشە رەت كادرلار جاساۋعا كوندىرۋ وڭاي ەمەس. ال اۋدارماشىم بولسا، كامەراعا ءتۇسىپ قالماس ءۇشىن بىرەسە كىشىگىرىم بولمەدە، بىرەسە شوپتەردىڭ اراسىندا جاسىرىنىپ ءجۇرىپ، كومەكتەستى.
- كوشپەندى قازاقتارمەن بىرنەشە اپتا بىرگە تۇرعاندا، ولاردان نەنى ۇيرەندىڭىز؟
- باستى تۇسىنگەنىم، مەن ولار سەكىلدى مىقتى ەمەسپىن. موڭعوليا - قالجىڭدايتىن مەكەن ەمەس. اۋا رايى - قاھارلى، ال ادامدارى وتە شىدامدى. ءۇش قابات كيىم كيگەننىڭ وزىندە مەن قاتىپ ءجۇردىم. ال ونداعى كەي بالالار كۇرتەشە كيىپ، بالمۇزداق جەپ ءجۇردى. بۇركىتپەن اڭشىلىق ەتەتىندەر نەگىزىنەن اڭشىلىققا قىستا شىعادى. قار مەن سۋىققا قاراماستان، اتقا ءمىنىپ، ايازدا ساعاتتاپ اڭ ىزدەيدى. ولاردىڭ مىقتىلىعىنا تەك تاڭىرقاۋمەن قاراي الاسىڭ.
- ءسىز ءۇشىن ەڭ قيىنى نە بولدى؟
- سۇيەكتەن وتەتىن اياز. ەن دالانىڭ جەلى مەن سۋىعىنا كەز- كەلگەن ادام شىداي المايدى. كەي كەزدەرى ساۋساقتارىم ءۇسىپ، كامەرانىڭ پەرنەسىن باسۋعا دا كەلمەي قالىپ جاتتى. ودان كەيىن تاعام. قازاقتار نەگىزىنەن ەت جەيدى. ەتتى كوپ جەي بەرمەيتىن ماعان كۇندە ەتپەن تاماقتانۋ قيىنعا سوقتى. كوڭىلدەرىن قالدىرماس ءۇشىن ءارى جەيتىن باسقا تۇك بولماعاسىن امالسىز اۋزىما سالۋمەن بولدىم.
- فيلمنىڭ كوڭىل- كۇيىن جاقسى جەتكىزۋگە نە سەپتىك بولدى؟
- مەن دىبىستارعا ۇلكەن ءمان بەردىم، اتتىڭ شاپقانى، اڭشىلاردىڭ داۋىسىنىڭ جاڭعىرىعى بارىنشا انىق ەستىلگەنىن قالادىم.
- ءسىز موڭعولياداعى قازاقتاردىڭ ءومىرى تۋرالى تاعى دا ءتۇسىرۋ مۇمكىندىگىن الساڭىز، قايتىپ بارار ما ەدىڭىز؟
- مەن بولاشاقتا انىق باراتىن ەدىم. ءبىراق ۇزاق فيلم ءتۇسىرۋ ءۇشىن الدەقايدا كوبىرەك قاراجاتپەن بارۋ كەرەك. اڭشى ادامداردى ءتۇسىرۋ وڭاي جۇمىس ەمەس، سول ءۇشىن وعان كوبىرەك قارجىلاندىرۋ بولعانىن قالايمىن.