سودان بەرى جەرگىلىكتى تۇرعىندار ىشەر اسقا جارىماي، اشتان قىرىلا باستاعان. قورشاۋدا قالعان قالا تۇرعىندارىنىڭ قارنى تويىپ اس ىشپەگەنىنە ءۇش ايدىڭ ءجۇزى بولدى. اسحانالارىنا قاراساڭ، قاڭىراپ بوس تۇرعان ىدىستان وزگە ەشنارسە كوزگە ىلىنبەيدى.
تۇرعىندار «جىلدىڭ جىلى مەزگىلىندە جاسىل ءشوپتى تالعاجاۋ ەتىپ كۇنەلتسەك، ەندى جەردى قار باسقاننان بەرى قارا سۋعا تۇز بەن بۇرىش قوسىپ قايناتىپ ءىشىپ، ولمەستىڭ كۇنىن كەشىپ جاتىرمىز» ، - دەيدى. جەرگىلىكتى اۋرۋحانانىڭ دارىگەرى موحاممەد يۋسۋفتىڭ ايتۋىنشا، كۇنىنە اشتىقتان بۇراتىلىپ 200-300 ادام كەلەدى ەكەن. سولاردىڭ ون شاقتىسى قازا تاپقان. ال سيرياداعى ىنتىماقتاستىق قوزعالىسىنىڭ نەگىزىن سالعان ابدۋلازيز الماشي ماداي قالاسىنداعى بۇل جاعدايعا ەل پرەزيدەنتى باشار اسادتى كىنالاپ وتىر.
ابدۋلازيز الماشي، سيرياداعى ىنتىماقتاستىق قوزعالىسىن قۇراۋشى:
- ادامدار اس پەن ءدارى- دارمەك تاپشىلىعىنان قاتتى زارداپ تارتىپ وتىر. الايدا بۇل اساد ءۇشىن جاڭالىق ەمەس. ول وپپوزيتسيانىڭ قاراۋىنداعى بۇل اۋدانعا كىرە الماعاندىقتان ءتۇرلى ايلا- شارا قولداندى. سولاردىڭ ءبىرى - اشتىق. مۇنى ادامدارعا قارسى قارۋ رەتىندە پايدالانىپ وتىر. ونىڭ بۇل ارەكەتتەرىن حالىقارالىق ۇيىمدار كەشىرمەۋى ءتيىس.
ال رەسمي داماسك گۋمانيتارلىق اپاتقا ءالى كۇنگە دەيىن ماداي قالاسىندا جاسىرىنىپ جۇرگەن سودىرلاردى ايىپتاپ وتىر. سيريانىڭ ب ۇ ۇ- داعى وكىلى باشار دجافاريدىڭ سوزىنشە، وسىعان دەيىن قالاعا جىبەرىلگەن گۋمانيتارلىق كومەكتى ءدال سول اۋداندا جاسىرىنعان سودىرلار توناپ الىپ كەتكەن. دەگەنمەن وسى جولى اشتىق ازابىن تارتقاندارعا جونەلتىلگەن جۇك كولىكتەرى دىتتەگەن جەرىنە امان- ەسەن جەتتى. ب ۇ ۇ- نىڭ مالىمەتى بويىنشا، ماداي قالاسىنىڭ 400-گە جۋىق تۇرعىنى وسىنداي حالدە. ال جالپى قورشاۋدا قالعان اۋدانداردا 4,5 مىڭ ادام ازاپتى كۇن كەشىپ جاتىر. ولاردىڭ بارلىعى گۋمانيتارلىق كومەككە مۇقتاج.
www.24.kz