2014 -جىلدىڭ ساۋىرىندە استانادا كۇل- قوقىس جاشىگىنەن نارەستە تابىلعان بولاتىن. ۇيلەرىنە قايتىپ كەلە جاتقان ەرلى-زايىپتى قوقىس جاشىكتەرى جاقتان بالانىڭ جىلاعان داۋىسىن ەستيدى. جاقىنداپ كەلىپ قاراسا، سول جاشىكتەردىڭ بىرەۋىندە ورامال مەن پاكەتكە وراعان نارەستە قىز بالا جاتىر ەكەن. ولار دەرەۋ حابار بەرىپ، سول جەرگە جەدەل مەديتسينالىق جاردەم ماماندارى كەلىپ جەتتى. العاشقى مەديتسينالىق كومەكتەن كەيىن ءسابي ەمحاناعا جەتكىزىلدى.
سول كەزدە پوليتسەيلەر قىز بالانىڭ اناسىن تاپقان بولاتىن. ول اتىراۋ وبلىسىنىڭ 1998 -جىلى تۋعان تۇرعىنى بولىپ شىقتى. ءوزىنىڭ جۇكتى ەكەنىن بىلگەن 16 جاستاعى قىز تۋعان قالاسىنان ەلورداعا اتتانىپ، وقۋعا تۇسەدى. ول ءوزىنىڭ جاعدايىن تۋىستارىنان جاسىرعان. قىزعا سوت ءبىر جىلعا باس بوستاندىعىنان شەكتەۋ جازاسىن كەستى.
وسىدان كەيىن نارەستە استاناداعى جەتىمحاناعا جىبەرىلگەن ەدى. قىز بالانىڭ جاڭا وتباسىعا بەرىلگەنى بۇگىن بەلگىلى بولدى. ونى جاڭا وتباسى وتكەن جىلى اسىراپ الىپتى.
بۇل تۋرالى Tengrinews.kz ءتىلشىسى حابارلايدى.