وسى ورايدا، قايسىبىر ەلدەردەگى پارلامەنت پەن ونىڭ دەپۋتاتتارىنا قاتىستى وزگەگە ەرسى كورىنگەنىمەن، وزدەرىنە قالىپتى جاعداي رەتىندە قابىلداناتىن جايتتاردى نازارلارىڭىزعا ۇسىنعاندى ءجون كوردىك.
اقىلعا قونىمسىز ارەكەتتى ۋادە ەتىپ دەپۋتات بولعان ءارتىس
1979-جىلى دانيانىڭ قالجىڭقۇمار ءارتىسى ياكويۋ حاۋگاردس پارلامەنتتىك سايلاۋعا ءوزىنىڭ قالجىڭعا نەگىزدەلگەن باعدارلاماسىمەن قاتىسادى. ول ءوز سايلاۋشىلارىنا كۇن تارتىبىنە نەگىزدەلگەن 8-8-8 جوباسى ۇسىنعان بولاتىن. ياعني، داۋىسقا سالۋ ناتيجەسىندە ول جەڭىپ شىققان جاعدايدا، سەگىز ساعاتتىق بوس ۋاقىت، سەگىز ساعاتتىق دەمالىس جانە سەگىز ساعاتتىق ۇيىقتاۋدى كۇن ءتارتىبىنىڭ بۇلجىماس قاعيداسىنا اينالدىرۋعا ۋادە ەتكەن.
ءبىر قىزىعى ءارتىستىڭ اقىلعا قونىمسىزداۋ ۇندەۋلەرى مۇنىمەن شەكتەلمەگەن. سولاردىڭ قاتارىندا - ۆەلوسيپەدپەن جۇرگەندە جەلدىڭ باعىتىن ىڭعايعا قاراي وزگەرتۋ، ۇزدىك اۋا رايىنىڭ بولجانۋى، سۋپەرماركەتتەگى كەزەكتى ازايتۋ سىندى ماسەلەلەردى تۋ ەتىپ كوتەرگەن.
سولاي بولا تۇرا ول، 1994-جىلى ءتيىستى داۋىس جيناپ، دەگەنىنە جەتەدى. ءسويتىپ، دانيا پارلامەنتىندە بەلگىلەنگەن 4 جىل مەرزىمدىك قىزمەتىن ءمىنسىز اتقارىپ شىعادى.
پارلامەنت ۇستەلىندەگى كامپيتكە قاتىستى جازىلماعان زاڭدىلىق
1965-جىلى رەسپۋبليكالىقتار اتىنان ا ق ش سەناتىنا سايلانعان سەناتور دجوردج مەرفي تاتتىگە تىم قۇمار بولعان. سوندىقتان دا ول ءوزىنىڭ جۇمىس ۇستەلىنىڭ ۇستىندە كامپيتتەردى ارتىعىمەن جيناپ، ساقتاپ وتىرعان. ال ونداي كامپيتتەردىڭ قىزىعىن دجوردج مەرفيدەن باسقا وزگە سەناتورلار دا كورەدى. ياعني، ۇستەل ۇستىندەگى كامپيتتەن اۋىز تيگەندەر، «قايتارىم اقىسى» رەتىندە ورنىنا كامپيت اكەلىپ وتىرعان. مەرفيدىڭ وتستاۆكاسىنان كەيىن بۇل ءۇردىس ۇمىت قالماي، ەسەسىنە، ورىندالۋى ءتيىس جازىلماعان زاڭدىلىققا اينالىپ كەتكەن.
كامپيت ۇستەلىندەگى ىدىستىڭ بوس قالماۋى ۇزاق جىلدار بويى باستى نازارعا الىنىپ كەلدى. الايدا، ءبىر عانا دەپۋتات - ريك سانتورۋم، 1997-جىلى بۇل قاعيدانىڭ قالتقىسىز ورىندالۋىنا قارسى بولىپ، قۇتىعا كامپيت سالۋدان باس تارتتى. دەگەنمەن، بۇل مىندەتتى ءمىنسىز ورىنداۋ قۇقىعىن «Hershey» مەن «Just Born» كومپانيالارى ءوز مويىندارىنا الىپ، مەرفيدىڭ «مىندەتىن» ون جىل بويىن ۇزدىكسىز جالعاستىردى.
دەپۋتاتتىڭ ءوتىنىپ سۇراق قويۋۋىنا مۇلدەم تىيىم سالىنعان
2003-جىلى وڭتۇستىك اۆستراليا شتاتىنىڭ پارلامەنت دەپۋتاتى كەرلين مەيۋولد مينيسترگە سۋ پايدالانۋدى شەكتەۋ ماسەلەسىنە قاتىستى ساۋال قويا وتىرىپ: «وزدەرىڭىزدىڭ مۇنداي جوسپارلارىڭىزدى قوعام اراسىندا قالاي تۇسىندىرمەكسىزدەر؟ وسى سۇراعىمىزعا جاۋاپ بەرۋىڭىزدى وتىنەمىن» دەگەن بولاتىن.
الايدا، پارلامەنت سپيكەرى «ءوتىنىش» ءسوزىن قولدانعانى ءۇشىن ءمينيستردىڭ دەپۋتات ساۋالىنا جاۋاپ بەرۋىنە ەشقانداي دا مۇمكىندىك بەرمەگەن. سويتسە، پارلامەنتتىڭ العاشقى رەگلامەنتىندە-اق، دەپۋتاتتاردىڭ ءوز ساۋالدارىنا جاۋاپتى وتىنە وتىرىپ سۇراۋىنا نەمەسە مۇنداي رايدا ءسوز سويلەۋىنە مۇلدەم تىيىم سالىنعان ەكەن.
Baq.kz