ستۋدەنتتەرگە ارنالعان ەڭ ادەمى جاتاقحانا

دانيا استاناسى كوپەنگاگەن قالاسىندا بارلىق جاعدايلار جاسالعان جاتاقحانا ورنالاسقان. مۇنداي عيماراتتى جاتاقحانا دەپ ايتۋدىڭ ءوزى قيىن.

 تيەتگەن - دومالاق فورمالى، ۇلكەن اۋلاسى بار ستۋدەنتتىك قالاشىق. ول 2006 - جىلى سالىنعان. عيماراتتىڭ اۋماعى  26800 شارشى مەتر. 7 قاباتتى عيماراتتا 360 بولمە بار. عيماراتتىڭ ءوزى سيليندرلىك فورمادا جانە بەس ۆەرتيكالدى سىزىقتارمەن قيىلىسادى. بۇل سىزىقتار عيماراتتى سەكتسيالارعا ءبولىپ تۇرادى.

ىشىندە ستۋدەنتتەر كەز- كەلگەن ۋاقىتتا ەركىن قولدانا الاتىن سكانەر، كوشىرمە ماشينا تۇراتىن وقۋ زالى بار. سونىمەن قاتار، كومپيۋتەر مەن پرينتەر قويىلعان بولمە بولەك. ءار بولمە 26-33 شارشى مەتردى قۇرايدى. 30 بولمە ەكى جاتىن بولمەدەن تۇرادى. بۇل بولمەلەر جۇپتارعا ارنايى جاسالعان. ولاردىڭ اۋماعى 45 شارشى مەتردى الىپ جاتىر. بارلىق بولمەدە ۇلكەن تەرەزە، جۋىناتىن بولمە جانە دارەتحانا بولەك ورنالاسقان. 60 بولمە تاجىريبە الماسۋ ماقساتىندا كەلگەن وقۋشىلارعا ارنالعان.

 عيماراتتا 30 اس بولمەسى بار، ياعني 12 بولمەگە 1 اس دايىندايتىن ورىن. ءار اس بولمەدە 2 پليتا، 4 توڭازتقىش جانە اس ىشەتىن بولمە بار. اس دايىنداۋعا قاجەتتى بارلىق ىدىس- اياقپەن قامتاماسىز ەتىلگەن.