ك ح د ر مالىمدەمەسىنە بايلانىستى شاقىرتىلعان قاۋىپسىزدىك كەڭەسىنىڭ شۇعىل وتىرىسىندا بىرلەسكەن مالىمدەمە جاسالدى. ونى كەڭەستىڭ 15 مۇشەسى، ونىڭ ىشىندە پحەنياننىڭ وداقتاسى بولىپ سانالاتىن قىتاي دا قولداپ شىقتى.
مالىمدەمەدە سۋتەكتى بومبانى سىناقتان وتكىزۋ قاۋىپسىزدىك كەڭەسىنىڭ الدىڭعى قارارىن تىكەلەي بۇزاتىندىعى ايتىلعان. وسىعان بايلانىستى ب ۇ ۇ قاۋىپسىزدىك كەڭەسى سولتۇستىك كورەياعا قاتىستى تاعى ءبىر قارار جوباسىن ازىرلەپ، پحەنيانعا قارسى سالىناتىن سانكسيانى كۇشەيتۋدى ويلاستىرىپ وتىر.
قاۋىپسىزدىك كەڭەسىنىڭ مۇشەلەرى پحەنياننىڭ تاراتقان سۋتەگى بومباسىن سىناقتان وتكىزۋ تۋرالى اقپاراتى شىندىققا اينالسا، بۇل عالامشاردىڭ بەيبىتشىلىگى مەن قاۋىپسىزدىگىنە ەلەۋلى قاۋىپ توندىرەتىنىن اتاپ ءوتتى.
بۇدان بۇرىن كوپتەگەن ەلدەر، ونىڭ ىشىندە رەسەي مەن ا ق ش سۋتەگى بومبانى سىناقتان وتكىزۋ تۋرالى اقپارات راستاۋدى قاجەت ەتەتىنىن اتاپ ءوتىپ، پحەنيان مالىمدەمەسىنە كۇمانمەن قاراپ كەلدى.
ءارى كوپتەگەن مەملەكەتتەر مەن حالىقارالىق ۇيىمدارى سولتۇستىك كورەيانىڭ جويقىن قارۋدى سىناۋىنا ءۇزىلدى كەسىلدى قارسى شىقتى. ونىڭ ىشىندە ا ق ش، رەسەي، وڭتۇستىك كورەيا، جاپونيا، سونداي- اق ن ا ت و مەن ە ق ى ۇ بار.