ءسابيت مۇقانوۆتىڭ ساتقىندىعى
الماتىدان تەاتردىڭ اشىلۋىنا كەلگەن ءسابيتتى جەرگىلىكتى جازۋشى-جۋرناليست جايىق بەكتۇروۆ ۇيىنە قوناققا شاقىرۋعا ىڭعاي تانىتقاندا، ءسابيت «جاكە، وسى زالدا اتاقتى ءالىمحان ەرمەكوۆ وتىر دەپ ەستىدىم. سول كىسىمەن ءبىر كەزدەسىپ، اڭگىمەلەسكىم كەلەدى. شوقان ءۋاليحانوۆ تۋرالى تريلوگيا جازعالى ءجۇر ەدىم، سوعان قاتىستى پوتانين تۋرالى مالىمەت سۇراعىم كەلەدى. ءالىمحان جاس كۇنىندە پوتانيندى ەرتىپ باياناۋىلعا كەلىپتى عوي. قىسقاسى، شوقان، پوتانين تۋرالى بىلگىم كەلەدى. قوناققا تەك رەسمي بيلىكتەن ەشكىمدى شاقىرما، ەكەۋدەن ەكەۋ كەزدەسەلىك» ، - دەپتى. الەكەڭدى جايىق اعا قوناققا شاقىرا بارعاندا، «مەنىمەن ءسابيتتىڭ اراسىندا قانداي اڭگىمە بولۋى مۇمكىن ەكەن؟» - دەپ ەرىكسىز مىرس ەتىپتى.
سونىمەن كەشكىلىك جازۋشى مەن عالىم جۋرناليستىڭ ۇيىندە كەزدەسىپ، سابەڭ كوسىلىپ سويلەۋگە كىرىسىپ كەتكەن ەكەن. سەكسەنگە تاياعان ءالىمحان اعا: - ءسابيت، نەگە ماعجان مەن جۇسىپبەكتى، اعارتۋشى اقاڭدى اقتاپ المايسىڭدار، مەرزىم جەتتى عوي؟ -، دەپ تارپا باس سالدى دەدى.
كۇمىلجىگەن بولىپ ءسابيت «انا ورگاندار ءالى رۇقسات بەرمەي جاتىر» دەگەن سىڭايدا ماردىمسىز جاۋاپ ايتىپتى. وسى ازاماتتاردىڭ باسى شىرعالاڭعا تۇسۋىنە ءسابيتتىڭ دە تىكەلەي قاتىسى بارىن ءبىلىپ، الەكەڭ جورتا ساۋالعا سالعان. ۇزىلگەن اڭگىمە قايتا ءوربىپ ءبىر كەزدە ءالىمحان اعا «جاڭاعى پەساڭدا ساكەن سەيفۋللين بارىپ ءاليحان بوكەيحانوۆقا «ءاي، سەن توبەت!» - دەپ زىركىلدەپ سويلەدى عوي.
سەن سول ديالوگتى اۆتور رەتىندە قايدان الدىڭ؟ ساكەن ءاليحانعا توبەت دەپ ايتپاق تۇگىل شاڭىنا ىلەسپەدى. ساكەنگە سەنىمسىزدىك تانىتقان بوكەيحانوۆ ونى «الاش» پارتياسىنىڭ ماڭىنان جۇرگىزگەن جوق. سەن بولساڭ تاريحقا قيانات جاساپ نە ىستەدىڭ؟!» دەگەندە، ءسابيت: «قوي ونداي ديالوگ قويىلىمدا بولماعان سەكىلدى ەدى» دەپ قىزارتا ءبورتىپ، ىڭعايسىزدانا كۇلىپ، وتىرىگىنە ءوزى ءتۇيىلىپ، بىرەسە ءالىمحانعا بىرەسە جايىققا قاراپ جەر بولدى دەيدى.
ءالىمحان ەرمەكوۆ - قازاقتان شىققان العاشقى ماتەماتيك، تاۋ-كەن ينجەنەرى، «الاش» پارتياسىنىڭ بەلسەندى وكىلى، قازاق ەلىنىڭ شەكاراسى بەلىگىلەنىپ جاتقاندا 1920-جىلدارى ۆ. ي. لەنينگە ەكى ساعات ىشىندە قازاق جەرلەرىن عىلىمي، كارتوگرافيالىق، ستاتيستيكالىق مالىمەتتەرمەن دالەلدەپ، كاسپي ماڭىنداعى ەكى وبلىس پەن سولتۇستىكتەگى ايماقتاردى قازاقتىڭ ەنشىسىنە الىپ قالعان تۇلعا. 18 جىل سوتتالىپ، ءسىبىردىڭ يتجەككەنىندە 3 رەت ايداۋدا بولعان ادام. قارتايعان شاعىندا ەندى سابيتكە پوتانين تۋرالى مالىمەت كەرەك بولىپ ىزدەي قالعانىن قارا...
bmtv.kz