ۇكىمەتتەگى عالىمدار كىمدەر؟

استانا. قازاقپارات - ەل تىزگىنىن ۇستاعان شەنەۋنىكتەردىڭ بۇعان دەيىن ەرەكشە قىرلارى تۋرالى جازىپ كەلدىك.

بۇگىن سىزدەرگە ۇكىمەت كابينەتىندەگى عالىم مينيسترلەر تىزبەگىن جاريالايمىز.

قازاقستان ۇكىمەتىندە ءبىر پرەمەر- مينيستر، ەكى ورىنباسارمەن قاتار 12 مينيستر بار. ولاردىڭ بارلىعى قاتارداعى شەنەۋنىك پەن الدە عالىم با؟ ەندەشە نازارلارىڭىزعا عىلىمي جۇمىستار جازىپ، ايتۋلى اتقا يە بولعان مينيسترلەردى ۇسىنامىز.

كارىم ءماسىموۆ

  

1. كارىم قاجىمقان ۇلى ءماسىموۆ - 2014 -جىلدىڭ 7 -ساۋىرىنەن باستاپ قازاقستان ۇكىمەتىنىڭ باسشىسى، قازاقستان پرەمەر- ءمينيسترى (2007 -  2012)، مەملەكەت قايراتكەرى. ورىس، اعىلشىن، قىتاي، اراب تىلدەرىن مەڭگەرگەن. ءتىپتى، تاتارشا دا كوسىلە سويلەيدى. ماماندىعى بويىنشا قارجىگەر، زاڭگەر، قىتايتانۋشى، ەكونوميكا عىلىمدارىنىڭ دوكتورى.

باقىتجان ساعىنتايەۆ

 

2. باقىتجان ءابدىر ۇلى ساعىنتايەۆ - 2012 -جىلدىڭ 16 -قاڭتارىنان باستاپ قازاقستان پرەمەر-ءمينيسترىنىڭ ورىنباسارى. 1990 -جىلى ەكونوميكا عىلىمدارىنىڭ كانديداتى بولدى. كانديداتتىق ديسسەرتاتسياسىنىڭ تاقىرىبى: «قالا جانە اۋىل حالقىنىڭ ءومىر ءسۇرۋ دەڭگەيىن جاقىنداستىرۋ». تابيعي مونوپوليالاردىڭ ارەكەت ەتۋ اۋماعىن مەملەكەتتىك رەتتەۋ، شاعىن جانە ورتا بيزنەستى دامىتۋ جونىندەگى ءبىرقاتار عىلىمي جۇمىستاردىڭ، جاريالانىمداردىڭ اۆتورى.

داريعا نازاربايەۆا

 

3. داريعا نۇرسۇلتان قىزى نازاربايەۆا - 2015 -جىلدىڭ 11 -قىركۇيەگىنەن قازاقستان پرەمەر- ءمينيسترىنىڭ ورىنباسارى. تاريح عىلىمدارىنىڭ كانديداتى (1991)، ساياساتتانۋ عىلىمدارىنىڭ دوكتورى (1998) . «ت م د ەلدەرىنىڭ ساياسي جۇيەلەرىن دەموكراتيالاندىرۋ: تاجىريبە، پروبلەمالار، باسىمدىلىقتار» دەگەن تاقىرىپتا دوكتورانتۋرالىق ديسسەرتاتسيا قورعادى. قازاق، ورىس، اعىلشىن، يتاليان، ازداپ نەمىس ءتىلىن مەڭگەرگەن.

يمانعالي تاسماعامبەتوۆ

 

4. يمانعالي نۇرعالي ۇلى تاسماعامبەتوۆ - 2014 -جىلدىڭ 22 -قازاننان باستاپ قازاقستاننىڭ قورعانىس ءمينيسترى بولىپ تاعايىندالدى. العاشقى ءبىلىمى بويىنشا گەوگرافيا جانە بيولوگيا ءپانىنىڭ مۇعالىمى بولعان ول 1990 -جىلى «دۇنيە تانۋ اسپەكتىلەرىنىڭ ەكولوگيالىق پروبلەماسى» تاقىرىبى بويىنشا ديسسەرتاتسياسىن قورعاپ، فيلوسوفيا عىلىمدارىنىڭ كانديداتى اتاعىنا قول جەتكىزدى. 7 جىلدان كەيىن «ترانزيتتىك ساياسي جۇيەلەرىندەگى الەۋمەتتىك ساياسات» عىلىمي زەرتتەۋ جۇمىسىن تاڭداپ، ساياساتتانۋ عىلىمدارىنىڭ دوكتورى اتاندى. ونشاقتى كىتاپتاردىڭ جانە كوپتەگەن عىلىمي ەڭبەكتەردىڭ اۆتورى.

ۆلاديمير شكولنيك

 

5. ۆلاديمير سەرگەيەۆيچ شكولنيك - 2014 -جىلدىڭ 6 -تامىزىنان باستاپ قازاقستاننىڭ ەنەرگەتيكا ءمينيسترى. فيزيكا- ماتەماتيكا عىلىمدارىنىڭ دوكتورى، ءال- فارابي اتىنداعى ۇلتتىق ۋنيۆەرسيتەتتىڭ قۇرمەتتى پروفەسسورى. قازاق ۇلتتىق اكادەمياسىنىڭ اكادەميگى. جۇزدەن اسا عىلىمي ەڭبەكتىڭ اۆتورى.

تامارا دۇيسەنوۆا

 

6. تامارا بوسىمبەك قىزى دۇيسەنوۆا - 2014 -جىلدىڭ 6 -تامىزىنان باستاپ قازاقستاننىڭ دەنساۋلىق ساقتاۋ جانە الەۋمەتتىك دامۋ ءمينيسترى. ەڭبەك جولىن اۋىلدا مۇعالىم بولىپ باستاعان شەنەۋنىك - ەكونوميكا عىلىمدارىنىڭ كانديداتى.

اسلان ءسارىنجىپوۆ

 

7. اسلان باكەن ۇلى ءسارىنجىپوۆ - قازاقستاننىڭ ءبىلىم جانە عىلىم ءمينيسترى قىزمەتىنە 2013 -جىلدىڭ 7 -قىركۇيەگىندە تاعايىندالدى. ەكونوميكا عىلىمدارىنىڭ كانديداتى، جوعارعى ءبىلىمدى اكىمشىلەندىرۋ سالاسىنداعى پەنسيلۆانيا ۋنيۆەرسيتەتىنىڭ (ا ق ش) دوكتورى. قازاق، ورىس، اعىلشىن تىلدەرىندە ەركىن سويلەيدى.

ارىستانبەك مۇحامەدي ۇلى

 

8. ارىستانبەك مۇحامەدي ۇلى 2014 -جىلعى 12 -تامىزدان قازاقستاننىڭ مادەنيەت جانە سپورت ءمينيسترى. ەڭبەك جولىن جامبىل اتىنداعى قازاق مەملەكەتتىك سيمفونيالىق وركەسترىنىڭ ءارتىسى بولىپ باستاعان. ونەر تانۋ دوكتورى، تاريح عىلىمدارىنىڭ كانديداتى. ونشاقتى انگە مۋزىكا جازعان كومپوزيتور.

تالعات دوناقوۆ

 

9. تالعات سوۆەتبەك ۇلى دوناقوۆ - 2015 -جىلدىڭ 11 -جەلتوقسانىنان باستاپ مەملەكەتتىك قىزمەت ىستەرى ءمينيسترى. اعىلشىن، ورىس تىلدەرىن مەڭگەرگەن، ماماندىعى بويىنشا زاڭگەر. زاڭ عىلىمدارىنىڭ كانديداتى.

ماتەريال ق ر زاڭناماسىنا سايكەس قورعالعان. بارلىق اۆتورلىق قۇقىقتار NUR. KZ ينتەرنەت- پورتالىنا تيەسىلى. ماتەريالدىڭ كەز- كەلگەن بولىگىن كوشىرۋ، تاراتۋ ءۇشىن رەداكتسيامەن بايلانىسۋ قاجەت

دەرەككوز:  NUR.KZ