بۇگىن مۇسىلمان جۇرتشىلىعى ءماۋلىت مەرەكەسىن تويلاۋدا
پايعامبار جانە ەلشى رەتىندە جىبەرىلگەن، پايعامبارلاردىڭ ەڭ سوڭعىسى جانە ەڭ ۇستەمى مۇحاممەد (س. ع. س.) 571-جىلى ءساۋىردىڭ 20 نا تۋرا كەلەتىن ءرابيۋلاۋۋال ايىنىڭ 12 ءسى دۇيسەنبىنىڭ تۇنىندە تاڭعا جۋىق مەككەدە دۇنيەگە كەلدى. مىنە، وسى كۇن «ءماۋلىت» مەرەكەسى بولىپ سانالادى.
بۇگىن دە الەم مۇسىلماندارىنىڭ حالىقتىق مەرەكەسىنە اينالعان، قۋانىش پەن شاتتىق كۇنى بولعان، «ءماۋلىت مەرەكەسى» سان عاسىردان بەرى جىل سايىن تويلانىپ كەلەدى. «ءماۋلىت» - تۋىلعان ءسات دەگەندى بىلدىرەدى. ءماۋلىت مەرەكەسىنىڭ ەڭ ماڭىزدى بولىگى پايعامبارىمىزعا (س. ع. س.) سالاۋات ايتۋ.
پايعامبارىمىز ءماۋلىت تۇنىندە ساحابالارعا تاعام ۇسىنىپ، بالا كەزىندە بولعان وقيعالاردى ايتاتىن بولعان. سوندىقتان دا، بۇل مەرەكە اللا راسۋلى تۋىلعان كەزدە الەمدە بولعان قۇبىلىستار مەن تەڭدەسسىز مۇعجيزالاردى ايتۋ، تىڭداۋ، ۇيرەنۋ جانە ادامدارعا ۇيرەتۋ وتە ساۋاپتى امالداردان سانالادى. ءماۋلىت ءتۇنى - قادىر تۇنىنەن كەيىنگى ەڭ قادىرلى تۇندەردىڭ ءبىرى. بۇل ءتۇنى پايعامبارىمىزدىڭ تۋىلعانىنا قۋانعاندار كەشىرىلەدى.
قازىرگى تاڭدا بۇل مەرەكەنى ءبىر-ەكى مەملەكەتتەن باسقا بارلىق يسلام ەلدەرى ەرەكشە ىلتيپاتپەن اتاپ وتەدى. بۇل ءتۇنى سازدى اسپاپتار جانە حارام نارسەلەردى ارالاستىرماي، ەركەك-ايەل ارالاسپاي، اللاھ ريزالىعى ءۇشىن ءماۋلىت جيىندارىن ۇيىمداستىرۋ، ءماۋلىت وقۋ، سالاۋات ايتۋ، حالىققا ءدامدى تاعامدار ۇسىنۋ، جاقسىلىقتار جاساۋ ءمۇستاحاب بولادى. بۇل كۇنى قۇران كارىم وقۋ، قازا نامازداردى وقۋ، ساداقا بەرۋ، دۇعا وقۋ جانە حاق تاعالادان كۇنالارىمىزدىڭ كەشىرىلۋىن تىلەۋ كەرەك.