قىتايلىق ەرلى-زايىپتىلار ون جىل بويى بەتون قۇدىقتا تۇرىپ كەلەدى - فوتو

استانا. قازاقپارات - قىتايداعى جىڭجوۋ قالاسىندا تۇراتىن ەرلى- زايىپتىلار كۇندەلىكتى ءومىردىڭ اۋىرتپالىعىمەن وزدەرىنشە كۇرەسۋدە.

ولار پاتەر جالداۋعا كەتەتىن اقشا مەن جۇمىسقا باراتىن جولاقىسىن ۇنەمدەۋ ءۇشىن مۇنداعى ۋنيۆەرسيتەتكە تيەسىلى اۋا جەلدەتكىش قۇدىقتى پانالاۋدا. قۇدىقتا تۇرعانىنا ون جىلدان اسا ۋاقىت بولعان وتباسى بارلىعى 50 شارشى مەتر جەرگە ورىن تەپكەن. ولاردىڭ بۇل «باسپاناعا» ۇيرەنىپ العانى سونشالىق، ءتىپتى قۇدىق تيەسىلى ۋنيۆەرسيتەت اكىمشىلىگىنىڭ ۇسىنعان جاتاقحاناسىنا دا كوشۋدەن باس تارتۋدا، دەپ حابارلايدى Ecns.cn.

سەبەبى ەرلى- زايىپتىلاردىڭ ايتۋىنشا، قۇدىقتا بارلىق جاعداي جاسالعان. مۇندا سۋ، ەلەكتر جارىعى، جىلۋ جۇرگىزىلىپ، تەلەديدار، توڭازىتقىش پەن كىر جۋۋ ماشيناسى دا قويىلعان. ايتا كەتۋ كەرەك، ەرلى-زايىپتىلاردىڭ ەكەۋى دە وسى ۋنيۆەرسيتەتتە جۇمىس ىستەيدى. وتاعاسى جەلدەتكىش قۇدىقتىڭ تەحنيكالىق احۋالىنا جاۋاپتى بولسا، ونىڭ ايەلى وسى جەلدەتكىش جۇيەنى ۋاقىتىلى قوسىپ-اجىراتىپ تۇرادى. ولار وسىدان ءبىراز ۋاقىت بۇرىن ارزان باعامەن جالعا بەرىلەتىن پاتەر تاۋىپتى. ءبىراق، ول باسپانا تۇرعان جەردەن جۇمىسقا جەتۋ ءۇشىن جارتى كۇن ۋاقىت كەتەتىن بولعاندىقتان، وتباسى وزدەرى جۇمىس ىستەيتىن ۋنيۆەرسيتەت اۋماعىنداعى وسى قۇدىقتا قالۋدان وزگە امال تاپپاعان.

www.24.kz