قانات يسلام: مەن ءوز حالقىمدى سۇيەمىن جانە ونىڭ باي- قۋاتتى باتىر ەل بولعانىن كورگىم كەلەدى
- قانات، اتىراۋعا قوش كەلدىڭىز! بارلىق قازاقستاندىقتاردى تولعاندىرىپ جۇرگەن باستى سۇراقتان باستايىن: كەزەكتى ايقاسىڭىز قاشان جانە كىممەن وتپەك؟
- الدىمەن اتىراۋلىقتارعا وسى ۇلكەن قوناقجايلىلىقتارى ءۇشىن العىس ايتامىن! ءبارى دە ءوز كەزەگىمەن كەلۋى كەرەك، سپورتتىق مانساپتا دا سولاي. اۋەسقوي بوكستا قازاقستان چەمپيونى بولۋ ءۇشىن 5-6 جىل كەرەك، وليمپياداعا 8-10 جىل دايىندالاسىڭ، كاسىپقوي بوكستا دا وسىنداي - جەتىستىكتىڭ كەلەسى شىڭىنا شىعۋ ءۇشىن بار كۇشىڭدى سالۋىڭ قاجەت. مىسالى، گەننادي گولوۆكين ءوز كاسىپقوي مانسابىن 2005 -جىلى باستادى، ال مەن ا ق ش- قا 2012 -جىلى باردىم. ءبارى بىردەن بولمايدى. قازىر ماعان كوپتەگەن ۇسىنىستار ءتۇسىپ جاتىر. الداعى جىلدارى ءوزىمدى بۇدان دا جوعارى بوكستىك دەڭگەيلەردە كورسەتۋ مۇمكىندىكتەرىن كۇتىپ وتىرمىن.
- نەگە ءسىز ءوز كاسىپقوي مانسابىڭىزدى WBA Fedelatin نۇسقاسىندا (لاتىن امەريكاسى ەلدەرىنە ارنالعان دۇنيەجۇزىلىك بوكس قاۋىمداستىعى) باستاۋدى قالادىڭىز؟ بىلۋىمشە، بۇل WBA- داعى قيىن نۇسقا ەمەس پە؟
- مەن قازىر فلوريدا شتاتى مايامي قالاسىندا تۇرامىن. جول الىس، ەكى ورتادا ۇنەمى بارىپ- كەلۋگە، ۇزاق ۋاقىت ۇشىپ- قونۋعا كوپ قۋات كەتەدى. سوندىقتان دا جاقىن ورنالاسقان كولۋمبيا، ەكۆادور سياقتى لاتىنامەريكالىق ەلدەردەن رەيتينگ جيناۋدى ءجون كوردىم. مەن ءوز كۇشىمە سەنىمدى بولدىم جانە از ۋاقىتتىڭ ىشىندە WBA Fedelatin نۇسقاسىندا چەمپيون بولا الدىم. ناتيجەلەرىمدى كورىپ وتىرسىزدار، وسى نۇسقاداعى جەڭىستەرىمنىڭ ارقاسىندا اياعىمنان تىك تۇرىپ، بۇگىندە بۇدان دا جوعارى الەمدىك دەڭگەيدە ءوزىمدى كورسەتۋگە شاقىرتۋلار الىپ جاتىرمىن.
- WBC، IBF نۇسقالارىندا بوكستاسۋ جوسپارىڭىزدا بار ما؟
- ءيا، بولاشاقتا وسى بەلگىلى بوكس ۇيىمدارىنا كىرىپ، چەمپيوندارىمەن رينگتە كەزدەسەمىن دەپ وتىرمىن. جوسپارلار كوپ، قۇداي قالاسا، جاقىن ارادا جۇزەگە اسىرامىن دەپ ويلايمىن.
- جاقىندا ايقاس وتكىزۋ تۋرالى ناقتى ۇسىنىستارىڭىز بار ما؟
- 26 - جەلتوقساندا قىتايدا كەزىندە گولوۆكينمەن كەزدەسكەن كولۋمبيالىق بوكسشىمەن رەيتينگتىك ايقاس وتكىزۋدى جوسپارلاپ وتىرمىن. الايدا بۇل كەزدەسۋ بىرنەشە سەبەپتەرمەن كەيىن شەگەرىلىپ كەلدى. بۇل ايقاس استانادا نەمەسە الماتىدا ءوتۋى مۇمكىن. ءبىر اپتانىڭ ىشىندە كەلىسسوزدەر اياقتالادى دەپ ويلايمىن.
- قازاقستاندا كاسىپقوي بوكس ايقاستارىن وتكىزۋ مۇمكىن بە؟
- نەگە مۇمكىن ەمەس؟ قازاقستاندا سپورت قارىشتاپ دامىپ كەلەدى. تەك اتىراۋدىڭ وزىندە ءبىر جىل ىشىندە بوكستان ءۇش حالىقارالىق تۋرنير ءوتتى. وبلىستىق دەڭگەيدىڭ وزىندە بەدەلدى جارىستار ۇيىمداستىرىپ، شەتەلدىك سپورتشىلاردى شاقىرۋ مۇمكىندىگىنىڭ بار ەكەندىگى قۋانتادى. قازاقستاندا ءوز كاسىپقوي ايقاسىمدى وتكىزۋ جوسپارىمدا بار.
- جاقىندا ءسىز ەل حەيمونمەن (الەم چەمپيونى فلويد مەيۆەززەردىڭ بەلگىلى امەريكاندىق مەنەدجەرى) كەلىسىمشارتقا وتىردىڭىز.
- نەلسون لوپەس مەنىڭ پروموۋتەرىم بولىپ قالا بەرەدى، ال ەل حەيمون - مەنەدجەرىم. مەنىڭ ايقاستارىمدى Showtime (امەريكاندىق كابەلدىك جانە سپۋتنيكتىك تەلەديداردىڭ پرەميۋم ارناسى) بويىنشا كورسەتۋ تۋرالى كەلىسسوزدەر جۇرگىزىپ جاتىرمىز.
- ءبىز ءسىزدىڭ جەڭىستەرىڭىز تۋرالى تەك ينتەرنەتتەن عانا ءبىلىپ وتىرامىز. قازاقستاندىق ارنالار ءسىزدىڭ ايقاستارىڭىزدى جاقىن ازىردە كورسەتپەيدى دەپ ويلايمىن.
- باسىندا ايتقانىمداي، ءبارىنىڭ ءوز ۋاقىتى بار. ءبارى دە الدا، ال ازىرگە كەلىسىم مەن كەلىسىمشارت بويىنشا مەنىڭ ايقاستارىمدى Showtime جەلىلەرىندە كورسەتەتىن بولادى.
- قازىرگى بوكس بۇرىنعى قىزىقتىلىعىن جوعالتىپ بارا جاتىر، تەك جوعارى گونورارلار العىسى كەلەتىن پراگماتيكالىق بوكسشىلاردىڭ زامانى تۋدى دەگەن پىكىر بار. قالاي ويلايسىز، قازىر ارتۋرو گاتتي - ميككي ۋورد ايقاسى سياقتى «جان بەرىسكەن» ايقاستار نەگە جوق؟
- قانشا ادام بولسا، سونشا پىكىر بولادى. مەن بوكس الەمىنىڭ وكىلى رەتىندە رينگ وزگەردى دەپ ايتا المايمىن. گاتتي مەن ۋوردقا كەلسەك، ولار ءبىر- بىرىنە جاقسى سايكەس كەلگەن قارسىلاستار عانا. جاقسى، قىزىقتى ايقاستار جوعالعان جوق، پاكياو مەن ماركەستىڭ تەكەتىرەسىنىڭ ءوزى نەگە تۇرادى. بۇل وتە جوعارى دەڭگەيدە وتكىزىلگەن وتە قىزىقتى ايقاس بولدى. ادامدار وزدەرىندە باردى باعالاي المايدى، بوكستى وزگەرتۋ مۇمكىن ەمەس. بۇل جۇيە.
- قانات يسلام رينگتەن تىس ومىردە نە تۋرالى ويلايدى؟
- مەن ءوز حالقىمدى سۇيەمىن جانە ونى باي- قۋاتتى جانە مىقتى، باتىر ەل بولعانىن كورگىم كەلەدى. جەتىستىكتەرىنە شىن جۇرەكتەن قۋانىپ، كەمشىلىكتەرىنە كۇيىنەمىن. ەلىمىزدى ءبىز ويلاماعاندا، ءبىز كۇيىپ- پىسپەگەندە، كىم ويلايدى؟ سوندىقتان دا مەنىڭ حالىقارالىق رينگتەگى باستى ماقساتىم - قازاقستاننىڭ بەدەلىن ارتتىرۋعا از دا بولسا ءوز ۇلەسىمدى قوسۋ. وتانداستارىمدى العا قاراي دا ءوز جەتىستىكتەرىممەن قۋانتامىن دەپ ويلايمىن.
«اق جايىق»