تىڭدارماندارىنا رەنجىگەن بۇركىتتىڭ جىلاعىسى كەلدى

استانا. قازاقپارات - تانىمال ءانشى بۇركىت وزگە ەسترادا جۇلدىزدارىمەن كوشە تازارتىپ، قوقىس تازالاعان سۋرەتتەرىن الەۋمەتتىك جەلىگە جۇكتەگەن سوڭ، تىڭدارماندار تاراپىنان قارشا بوراعان تەرىس پىكىرلەردىڭ استىندا قالدى.

ارتىستەردىڭ سىرتقى كەلبەتىن ءسوز ەتكەندەر جۇلدىزداردىڭ تۇگىن قالدىرماي، باسىنان باقايىنا شەيىن نە كيىپ كەلگەنىن تالقىلاپ، انشىلەردىڭ كوشەگە ءوز ەركىمەن ەمەس، بىرەۋدىڭ كۇشتەۋىمەن شىققانىن دا توپشىلادى.

كەيبىر جەلى جازىلۋشىلارى بۇركىتتىڭ اياق- كيىمى تاپ-تازا بولىپ تۇرعانىنا سۇيەنىپ، جۇمىس جاساعانىنا كۇماندانسا، ەندى بىرەۋلەر ارتىستەردىڭ قۇندىز تونىنا ءتيىستى.

«قانشاما تەرىس پىكىرلەر جازىپ جاتىرسىزدار! ۇيات- اي! مەن قاتتى ۇيالىپ وتىرمىن سىزدەر ءۇشىن. 30 مينۋت بولسا دا، مىنا سۋرەتتەگى ادامدار، قانداي كيىم كيىپ كەلسە دە، قىزدار بويانىپ كەلسە دە، ەشكىمگە ەشقانداي قارىزى جوق، بىرەۋلەردىڭ كوشەسىندەگى قوقىم- سوقىمداردى سىپىرتقى مەن كۇرەك الىپ تازارتىپ كەتتى»، - دەيدى بۇركىت عالامتور قولدانۋشىلارىنا.

«ادامدارعا جاقسىلىق جاساپ، ريزاشىلىعىن الىپ كەتكەن پەندەلەر بۇل. ال سىزدەر ۇيلەرىڭىزدە وتىرىپ الىپ، بىرەۋلەردى جامانداۋدان نەمەسە سىن ايتۋدان جالىقپايسىڭدار. ۇيات ەكەن. جىلاعىم كەلىپ وتىر»، - دەپ جالعاستىردى ءسوزىن ءانشى.

انشىلەردى قوقىس جيناۋعا ەشكىم قيناپ اپارماعانىن ايتقان بۇركىت تىڭدارمانداردىڭ وسى ىسكە دە تاتىماي تۇرعانىن تىلگە تيەك ەتتى.

ءسوز سوڭىندا، وتاندىق ءانشى قازاق حالقىنىڭ ۇنامسىز قىلىققا بارمايتىنىنا، ونداي ەمەستىگىنە قاتتى سەنەتىنىن اتاپ ءوتتى.

دەرەككوز: NUR. KZ