سەناتورلارعا مەملەكەتتىك ماراپاتتار تابىس ەتىلدى
پالاتا ءتوراعاسى قاسىم-جومارت توقايەۆ ءوز سوزىندە: «ەلباسىمىز نۇرسۇلتان ءابىش ۇلى نازاربايەۆتىڭ كورەگەن ساياساتىنىڭ ارقاسىندا قازاقستان تاۋەلسىزدىكتىڭ ءار جىلىندا مول تابىستارعا قول جەتكىزىپ كەلەدى»، - دەپ اتاپ ءوتتى.
ءتوراعا ءوتىپ بارا جاتقان جىلداعى ەلىمىز ءۇشىن ماڭىزدى وقيعالارعا - پرەزيدەنت سايلاۋىندا ن. نازاربايەۆتىڭ بۇكىلحالىقتىق جاپپاي قولداۋعا يە بولعانىنا، قازاق حاندىعىنىڭ 550 جىلدىعى، كونستيتۋتسيانىڭ جانە قازاقستان حالقى اسسامبلەياسىنىڭ 20 جىلدىعى، الەمدىك جانە ءداستۇرلى دىندەر ليدەرلەرىنىڭ V سەزى وتكىزىلگەنىنە نازار اۋداردى.
ق. توقايەۆ دەپۋتاتتاردىڭ ناتيجەلى ەڭبەگىن ايتا كەلىپ، ۇلت جوسپارىن زاڭنامالىق تۇرعىدان قامتاماسىز ەتۋ ءۇشىن الپىسقا جۋىق زاڭ قابىلدانعانىن اتاپ ءوتتى. ءتوراعا سەناتورلاردى پرەزيدەنتتىڭ جاڭا «قازاقستان جاڭا جاھاندىق ناقتى احۋالدا: ءوسۋ، رەفورمالار، دامۋ» جولداۋىن تۇسىندىرۋگە بەلسەنە اتسالىسۋعا شاقىردى.
ارىپتەستەرىن مەرەكەمەن قۇتتىقتاعان ق. توقايەۆ «تاۋەلسىزدىكتى ماڭگىلىك ەتۋ - ءاربىر قازاقستاندىقتىڭ وتان الدىنداعى قاسيەتتى پارىزى» دەدى.
تاۋەلسىزدىك كۇنى قارساڭىندا قازاقستان رەسپۋبليكاسى پرەزيدەنتىنىڭ جارلىعىمەن ءبىر توپ سەناتورلار مەملەكەتتىك جانە قوعامدىق ىستەگى قىزمەتى، ەلىمىزدىڭ الەۋمەتتىك- ەكونوميكالىق جانە مادەني دامۋىنا، سونداي-اق حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن مەملەكەتتىك ناگرادالارعا يە بولدى.
سەناتور سارسەنباي ەڭسەگەنوۆ «پاراسات» وردەنىمەن، سەرگەي ەرشوۆ، گەورگي كيم «قۇرمەت» وردەنىمەن، سەناتور ميحايل بورتنيك ت م د پارلامەنتارالىق اسسامبلەياسىنىڭ «سودرۋجەستۆو» وردەنىمەن ماراپاتتالدى.
سەناتورلار ءبىرعانىم ءايتىموۆا، ۆلاديمير بوبروۆ، سەرگەي گروموۆ، ەربولات مۇقايەۆقا ت م د پ ا ا- نىڭ «پارلامەنتتىك ىنتىماقتاستىقتى نىعايتۋعا قوسقان ۇلەسى ءۇشىن» مەدالى تابىس ەتىلدى.
سەناتورلار جابال ەرعاليەۆ، ولگا پەرەپەچينا ت م د- نىڭ قۇرمەت گراموتاسىمەن، سەناتور اقان بيجانوۆ ۇ ق ش ۇ پارلامەنتتىك اسسامبلەياسىنىڭ قۇرمەت گراموتاسىمەن ماراپاتتالدى.
ودان باسقا، جوعارعى پالاتا بيۋروسىنىڭ قاۋلىسىمەن ۇكىمەتتىڭ پارلامەنتتەگى وكىلى سايلاۋحان رايىمبەكوۆ قازاقستان رەسپۋبليكاسى پارلامەنتى سەناتىنىڭ قۇرمەت گراموتاسىنا يە بولدى.
اۆتور: سەرىك قاراجان