«بۇگىن ەلباسى - ق ر ق ك جوعارعى باس قولباسشىسىنىڭ ارنايى جارلىعىمەن وتانى مەن حالقى الدىندا ءوز بورىشىن ورىنداي وتىرىپ، باتىلدىق تانىتىپ، وپات بولعان ساربازدار ماراپاتتالادى. بۇل ەسىمدەرى ماڭگى جادىمىزدا قالاتىن ايبىندى اسكەري قىزمەتشىلەرىمىزدى قۇرمەتتەۋ بەلگىسى.
ماقساتىمىز مەدالداردى تابىستاۋ عانا ەمەس، سونىمەن بىرگە قايعىلارىڭىزعا ورتاق بولۋ بولىپ تابىلادى. ارينە، اناسى مەن اكەسىنە قازا بولعان ۇلدارىن ەشبىر ماراپات قايتارا المايدى. ءبىز ونى جاقسى تۇسىنەمىز. الايدا، وزگەلەرگە ۇلگى- ونەگە بولىپ تابىلاتىن ساربازدىڭ باتىلدىعىنىڭ ماڭىزدىلىعىن، وتان قورعاۋشىسىنىڭ ابىرويىن، اسكەري قىزمەتشىنىڭ بەينەسىن ەشكىم جوققا شىعارا المايدى. بۇل مەدالدار جۇبانىش بولىپ تابىلمايدى، ءبىراق، ماقتاۋعا تۇرارلىق ۇل تاربيەلەپ وسىرگەن اتا- انالار ءۇشىن ناعىز حالىقتىڭ سىي- قۇرمەتى ىسپەتتى» ، - دەدى ق ر قورعانىس ءمينيسترى يمانعالي تاسماعامبەتوۆ.
قازا بولعاننان كەيىن ۇلان قاتارداعى جاۋىنگەرى اسىلجان ماحامبەتوۆ، ۇلان قاتارداعى جاۋىنگەرى زامير ءادىلوۆ، ۇلان قاتارداعى جاۋىنگەرى باۋىرجان جولدىباي جانە ۇلان قاتارداعى جاۋىنگەرى باعىتجان قالىباي «ەرلىگى ءۇشىن» مەدالدارىن يەلەندى.
ەستەرىڭىزگە سالا كەتسەك، قايعىلى وقيعا اقتاۋدا 18 - قىركۇيەكتە «ورتالىق-2015» وقۋ- جاتتىعۋىنىڭ 2-كەزەڭىن وتكىزۋ كەزىندە ورىن الدى. وقۋ- جاتتىعۋ بارىسىندا 4 اسكەري قىزمەتشى سۋعا باتىپ كەتتى. بۇگىنگى كۇنى تەرگەۋ ءالى جالعاسۋدا، دەپ حابارلايدى ق ر ق م باسپا ءسوز قىزمەتى.