بۇرىن حابارلانعانداي، ءابىش كەكىلباي ۇلىن اقتىق ساپارعا شىعارىپ سالۋ ءراسىمى بۇگىن استاناداعى «كورمە» كەشەنىندە وتكەن بولاتىن.
«قۇرمەتتى قاۋىم! جاقىن تۋىستارى مەن قالىڭ جۇرتشىلىقتىڭ كەلىسىمىمەن، ەلباسى شەشىمىمەن قازاقستاننىڭ حالىق جازۋشىسى، ەڭبەك ەرى كەكىلبايەۆ ءابىش كەكىلباي ۇلىنىڭ سۇيەگى استانا قالاسىنداعى ۇلتتىق پانتەوندا جەرلەنەتىنىن حابارلايمىن. ۇلى جازۋشى، قازاق حالقىنىڭ جارقىن پەرزەنتى ءابىش كەكىلباي ۇلىنىڭ رۋحى ەلىمەن ماڭگى جاسايدى»، - دەدى بۇگىن سەنات ءتوراعاسى قاسىم-جومارت توقايەۆ كەمەڭگەر تۇلعا ءابىش كەكىلباي ۇلىن اقتىق ساپارعا شىعارىپ سالۋ قارالى جيىنىندا.
ۇلتتىق پانتەون - قازاقستاننىڭ بەلگىلى قوعام جانە مەملەكەتتىك قايراتكەرلەرىنە ارنالعان زيرات. 2013-جىلدىڭ قازانىندا ق ر پرەزيدەنتى نۇرسۇلتان نازاربايەۆتىڭ شەشىمىمەن ۇلتتىق پانتەونعا العاشقى بولىپ بەلگىلى ساياسي قايراتكەر ورال مۇحامەدجانوۆ جەرلەنگەن بولاتىن. ال 2014 -جىلدىڭ قاڭتارىندا حالىق اقىنى، قوعام جانە مەملەكەت قايراتكەرى، مەملەكەتتىك سىيلىقتىڭ لاۋرەاتى فاريزا وڭعارسىنوۆا، بيىلعى قازاندا زاڭ عىلىمدارىنىڭ دوكتورى، پروفەسسور، كورنەكتى قوعام جانە مەملەكەت قايراتكەرى ماقسۇت سۇلتان ۇلى نارىكبايەۆ پانتەونعا جەرلەندى.
اۆتور: رۋسلان عابباسوۆ