كەمەڭگەر تۇلعا، ءىرى قوعام قايراتكەرى، اسا دارىندى جازۋشى، ەرەكشە دارىن يەسى ەكەندىگىن بارشاعا مويىنداتا بىلگەن ءابىش كەكىلبايەۆتى اقتىق ساپارعا شىعارىپ سالۋعا سەنات ءتوراعاسى قاسىم-جومارت توقايەۆ، ءماجىلىس ءتوراعاسى قابيبوللا جاقىپوۆ، ق ر مەلەكەتتىك حاتشىسى گۇلشارا ءابدىقالىقوۆا، ق ر قورعانىس ءمينيسترى يمانعالي تاسماعامبەتوۆ، ق ر سىرتقى ىستەر ءمينيسترى ەرلان ىدىرىسوۆ، ۇ ق ك ءتوراعاسى نۇرتاي ابىقايەۆ، ق ر پارلامەنتىنىڭ دەپۋتاتتارى، وبلىس اكىمدەرى، ەلىمىزدىڭ كورنەكتى مادەنيەت جانە ونەر قايراتكەرلەرى، جازۋشىلار، اقىندار جانە ەلوردا جۇرتشىلىعى كەلدى.
«ق ر ەڭبەك ەرى، قازاق ادەبيەتىنىڭ ابىزى، ەلباسىمەن بىرگە تاۋەلسىز مەملەكەتتىڭ بەرىك ىرگەسىن قالاۋعا ايانباي اتسالىسقان كورنەكتى مەملەكەت جانە قوعام قايراتكەرى ءابىش كەكىلباي ۇلىن سوڭعى ساپارعا شىعارىپ سالۋعا جينالىپ وتىرمىز. بۇل قازاقستان جۇرشىلىعىنىڭ قابىرعاسىن قايىستىرعان ورنى تولماس قازا. ءابىش كەكىلباي ۇلى قازاق رۋحانياتىنىڭ ءوسىپ، وركەندەۋىنە ولشەۋسىز ۇلەس قوستى. قازاق ادەبيەتىن ءابىش كەكىلبايەۆسىز ەلەستەتۋ مۇمكىن ەمەس»، - دەدى قاسىم جومارت توقايەۆ «كورمە» كەشەنىندە ءا. كەكىلباي ۇلىن اقتىق ساپارعا شىعارىپ سالۋ شاراسىندا.
ۇلتى ءۇشىن ابىز - ءابىش ماڭگى قازاقتىڭ جۇرەگىندە، ەلىمىز ماڭگى جاساسا، قازاقتىڭ كەمەڭگەر تۇلعاسى دا ماڭگى جاسايدى.
ءابىش كەكىلباي ۇلى 1939-جىلى 6 جەلتوقسان كۇنى ماڭعىستاۋ وبلىسى، ماڭعىستاۋ اۋدانى (بۇرىنعى گۋريەۆ وبلىسى)، وڭدى اۋىلىنىڭ مىرزايىر دەگەن جەرىندە تۋعان.
اۆتور: رۋسلان عابباسوۆ