بارلىعى بىردەن-اق اقشالى بولىپ، ۇلكەن بيزنەسمەن اتانعىسى كەلەدى. نەمەسە ناق داۋلەتتىنىڭ وزىنە اينالىپ، باسىنا سول باق قونا قالسا ەكەن. باي- باعلان بولىپ، ءىرى-ءىرى سويلەۋدى قالايدى. سوندا كىم قىزمەت ىستەيدى، قايسىسى ءار سالانىڭ باسىندا وتىرادى؟..
نەگىزىندە، ءاربىر ادام بەلگىلى ءبىر سالانى مەڭگەرىپ، سونىڭ مايتالمان مامانى بولۋعا ابدەن مۇمكىندىگى بار. وعان تەك جىلدار وزدىرىپ، تاجىريبە جيناقتاسا بولعانى دا. قازاق «كاسىبى باردى - ءناسىبى بار» دەيدى عوي. وسى سەبەپتى ءوزىڭ جانىڭ قالاپ، اينالىسقىڭ كەلگەن كاسىپپەن شۇعىلدانۋىڭ ءتيىس. سوندا نە قيىندىقتى بولسىن ەڭسەرىپ، بيىك بەلەستەردى باعىندىراسىڭ. بىلايشا ايتقاندا، سول كاسىبىڭە ەرەكشە ماحاببات بولعاندا شارشاۋدى دا، نە جالىعۋدى دا بىلمەيسىڭ عوي كادىمگى. سوندىقتان نەمەن شۇعىلدانساڭ دا، نەندەي كاسىپتىڭ باسىن ۇستاساڭ دا وعان بۇتىنبولەك ماحاببات، الابوتەن ىسكەرلىك كەرەك.
كەي-كەيدە تاعدىر ءوز دەگەنىنە كوندىرىپ، ءومىرىڭدى كۇيزەلىسكە تۇسىرەدى. بولمايتىن ءبىر نارسەلەر كولدەنەڭ تارتىپ، قيىنشىلىق اتاۋلىدان قۇتىلمايسىڭ وسى. سوندا نە ىستەرىڭدى دە بىلمەي، نە كاسىپتى بولسا دا ىستەۋگە تۋرا كەلەدى. وندايدا قايعى كەلدى ەكەن دەپ قۇلاي بەرىلۋ جارامايدى. تاۋەكەلگە بەلدى بەكەم بۋىپ، تەك كىرىسىپ كەتۋ كەرەك ارينە.
ايتسە دە بازبىرەۋلەردىڭ بىرنەشە ماماندىعى بولا تۇرا، نە بىرنەشە كاسىپتى يگەرە كەلە ءتۇپتىڭ- تۇبىندە جۇمىسسىز قالىپ، بوس ساندالعانىن قايتەرسىڭ. ولار تۇراقتى ءبىر جۇمىستىڭ باسىن شالماي، ناق سونىڭ ابدەن نانىن جەمەي، ايتەۋىر ءبىر جەردەن شىعىپ، ەكىنشى ءبىر جەرگە كىرىپ، تابانىن توزدىرادى. ونىسىن جالپى ورىنسىز كورمەيدى. سول باياعىشا نە اندا جوق، نە مۇندا جوق، ءتايىرى!
سوندىقتان، زامانداس، ەشبىر كاسىپتىڭ جامانى بولمايدى. تەك از- كەم سابىر قىلىپ، ايانباي ەڭبەك ەتسەڭ، ەرىنبەي كاسىبىڭدى ەمسەڭ، مول نەسىبەگە كەنەلەرىڭ انىق. نەمەسە حالقىمىزدىڭ «ەڭبەك ەتسەڭ ەرىنبەي، تويادى قارنىڭ تىلەنبەي» دەيتىن ماقالىنىڭ شىندىققا اينالارىنا كوز جەتكىزەسىڭ!...
عالىمقۇل بىرلىك