قازاقستاننىڭ حالىق جازۋشىسى، مەملەكەت جانە قوعام قايراتكەرى، قازاقستان رەسپۋبليكاسىنىڭ العاشقى مەملەكەتتىك حاتشىسى ءابىش كەكىلباي ۇلىنىڭ قازاسىنا بايلانىستى بەلگىلى جازۋشى، حالىقارالىق الاش سىيلىعىنىڭ لاۋرەاتى بەكسۇلتان نۇرجەكە ۇلى وسىلاي دەدى.
ونىڭ ايتۋىنشا، ءابىش كەكىلباي ۇلىنىڭ بارلىق شىعارمالارى فيلوسوفيالىق، كوركەمدىك، ماعىنالىق، تەرەڭدىك جانە استارلاپ ايتۋ جاعىنان جۇمىر قۇرىلعان دۇنيەلەر.
«تۋماق بار دا ولمەك بار. ءبىراق، ۇلكەن ازاماتىمىزدان ايرىلىپ، قابىرعامىز قايىسىپ وتىر. ابەكەڭنىڭ ەسىمى، ونىڭ بارلىعىنىڭ ءوزى ادەبيەتىمىزدە ادىلدىكتىڭ، ادالدىقتىڭ بار ەكەندىگىن مەڭزەپ، دالەلدەپ تۇرۋشى ەدى. ابەكەڭ مىنا تاريح پەن ءومىردى تەڭ بىلەتىن. تاريحسىز شىعارماسى جوق دەۋگە بولادى. تاريح سالاسىن وتە كوپ زەرتتەگەن. وتە كوپ وقىعان. ءتىپتى، مەن كەزىندە باسپادا ىستەگەنمىن، كىتاپ سۇراتىپ الىپ وقيتىن. ودان ارلانبايتىن. ونىڭ ناعىز قازىنا ەكەنىن جاقسى بىلەتىن. ابەكەڭنىڭ كەز كەلگەن شىعارماسىن وقىڭىزشى، ارعى جاعىندا ءبىر تاريحتىڭ ەلەسى تۇرادى. تاريحتى تەرەڭ بىلەتىندىگى كورىنىپ تۇرادى. ال تاريحى تاياز شىعارمانىڭ ءوزى تەرەڭ تامىرلى دا بولمايدى عوي. مىنە، ءابىش كەكىلباي ۇلىنىڭ باسقا جازۋشىلاردان ەرەكشەلىگىنىڭ ءوزى وسىندا ەدى. مىقتىلىعى دا سوندا بولاتىن»، - دەدى ب. نۇرجەكە ۇلى.
اۆتور: جاپپاربەرگەن ايبوتا