تاڭعى ساعات 08.31 دە «101» پۋلتىنە الاش تاس جولى، 4 -مەكەنجايىندا ورنالاسقان شارىن بازارىنىڭ اۋماعىندا اسحانا ورتەنىپ جاتىر دەگەن ءبىرىنشى حابارلاما تۇسكەن. ارادا 8 مينۋت وتكەندە وقيعا ورنىنا ءورت ءسوندىرۋ ءبولىمىنىڭ كەزەكشى قاراۋىلىنداعى ءورت سوندىرۋشىلەرى جەتكەن.
«انىقتالعانداي، «شارىن» ازىق-تۇلىك بازارىنىڭ اۋماعىنداعى اسحانا رەتىندە پايدالانىلعان 40 شارشى مەتر اۋماقتاعى مەتالل كونتەينەردىڭ ىشىندەگى جيھاز، اعاش توسەمەلەر ورتەنگەن. ساعات 08.40 تا كومەككە شاقىرىلعان بولىمشە كەرى قايتارىلدى»، - دەلىنگەن باسپا ءسوز قىزمەتىنىڭ اقپاراتىندا. جالپى، قىزىل جالىن 12 مينۋت ىشىندە اۋىزىقتالعان.
سونىمەن قاتار، ساعات 10.00 گە جۋىقتاعان ۋاقىتتا ورتالىق بازار اۋماعىندا تاعى ءبىر كونتەينەر ورتەنە باستاعان. ءورت سوندىرۋشىلەر وقيعا ورنىنا 6 مينۋتتا جەتكەن.
«كيىم-كەشەك ساتاتىن ورتالىق بازار اۋماعىندا 15 شارشى مەتر جەردى الىپ جاتقان كونتەينەردە ەر ادامداردىڭ قىسقى كيىمدەرى ورتەنە باستادى. ءورت سوندىرۋشىلەر ءورتتى بىردەن ءوشىردى»، - دەپ حابارلاپ وتىر ت ج د. جالپى، ەكى ءورتتى ءسوندىرۋ ءۇشىن جەكە قۇرامداعى 3 تەحنيكا مەن 17 قىزمەتكەر جۇمىلدىرىلعان.
اۆتور: كەنجەكەي توقتامۇرات قىزى