جارتىلاي جالاڭاش كيىنگەن كەلىننىڭ بەتىن اشۋدىڭ قاجەتى بار ما؟
«قىزدار، اينالايىندار، تۇرمىسقا شىعاتىن كەزدە تويعا يىعى مەن كەۋدەسى اشىق، جوتاسى جالاڭاش، شەتەلدىك ۇلگىدەگى اق كويلەكتى كيمەڭدەرشى، باس تارتىڭدارشى سودان! نەگە وسى ءبىز وزگەنىڭ قاڭسىعىنا تاڭسىق بولامىز دا جۇرەمىز؟ بار عوي، قازاقتىڭ ادەمى كويلەكتەرى، ساۋكەلەسى! ءتىپتى، ارنايى تىكتىرۋگە دە بولادى. تويعا كەلەتىن ۇلكەن قاريالاردىڭ، اقساقالداردىڭ، اق جاۋلىقتى اجەلەردىڭ كوزىنشە جاڭا تۇسكەن كەلىننىڭ اشىق-شاشىق ءجۇرۋى جاراسپايدى. توي الدىندا بەتاشار جاسايتىنىمىز تاعى بار. ءوزى جارتىلاي جالاڭاش جۇرگەن كەلىننىڭ بەتىن اشۋدا نە ءمان قالادى؟»، - دەيدى احمەتوۆا.
زەينەپ احمەتوۆا كەلىندەرگە جاراسپايتىن ودان وزگە تەرىس ارەكەتتەردى تىزبەكتەدى.
«تاعى ءبىر تۇيتكىل: جاس كەلىننىڭ گۇل لاقتىرۋى. ول تەرىس قاراپ تۇرادى دا، قولىنداعى شوق گۇلدى ارت جاققا قاراي لاقتىرادى. ول جەردە كۇيەۋگە شىقپاعان ءبىر توپ جاس قىز ۋلاسىپ-شۋلاسىپ جاتادى. سىرتتاي قاراپ تۇرساڭ، وسىنىڭ ءوزى ەرسى ەمەس پە؟ سول تويدا الگى جاس بويجەتكەندەردىڭ اكە-شەشەسى، اعا-جەڭگەسى، اعايىن-تۋىسى وتىر. قانشا بايسىراپ بارا جاتساڭ دا، سولاردىڭ كوزىنشە «تەزىرەك كۇيەۋگە تيەيىن» دەپ گۇلگە سونشا تالاسىپ نە كورىندى؟»، - دەپ جالعاستىردى كەيۋانا.
احمەتوۆا اتاسىنىڭ اۋزىنا قاسىق تىققان كەلىن ەرتەڭ ونىڭ كوزىن شۇقىماي ما دەگەن ساۋال تاستادى.
«ۇيلەنۋ تويى ابدەن قىزىپ، ۇلكەن كىسىلەردىڭ كەيبىرى قايتىپ كەتىپ، قايسىبىر قوناقتاردىڭ كوزىنە ءبىر ادام، ەكى ادام بوپ كورىنە باستاعان تۇستا جالپ ەتىپ جارىق سونەتىنى بار. سويتسەك، تورت كەلە جاتىر ەكەن. ءبىر جاعىنان، توي اياعىندا تويىپ العان جۇرت سول تورتتى جەپ تە قارىق قىلمايدى، بەكەرگە ءراسۋا بولادى. ەكىنشىدەن، قۋانىش ۇستىندە شام ءسوندىرۋ - قازاقتا جامان ىرىم. «شىراعىڭ سونبەسىن» دەپ تىلەيمىز عوي ءبىر-بىرىمىزگە. مىناۋ - ەندى عانا شاڭىراق كوتەرىپ، شام جاعىپ جاتقان جاس وتاۋ ءۇشىن تىپتەن جاقسى ىرىم ەمەس. سوسىن ەكى جاس پەن ونىڭ اتا-اناسى ورتاعا شاقىرىلىپ، ءبىر-بىرىنە تورتتان اۋىز تيگىزەدى. بۇل قايدان شىققان سالت، نە ءسان؟ العاشقى كۇنى-اق قايىناتاسى مەن ەنەسىنىڭ اۋزىنا قاسىق تىققان كەلىن ەرتەڭ ولاردىڭ كوزىنە پىشاق تىعىپ جۇرمەي مە؟ بۇل ءداستۇرسىماقتىڭ ورنىنا كەلىن ءشاي ۇيىمداستىرسا قانداي جاقسى بولار ەدى؟ ارينە، تويداعى ادامنىڭ بارىنە ءشاي قۇيۋى شارتى ەمەس. توردەگى ەڭ ۇلكەن اجەلەر مەن اتالاردىڭ ۇستەلىنە بارىپ، ول كىسىلەرگە ىقىلاسپەن ءبىر-ءبىر كەسە قۇيىپ بەرسە، باتالارىن الار ەدى عوي»، - دەيدى زەينەپ اپا.
كوپتى كورگەن كەيۋانا تويدا جىرتىس-كوكپار ۇيىمداستىرۋدا ۇسىنىپ وتىر.
«باياعىدا قىز ۇزاتىلعاندا اتام قازاق كوكپار بەرگەن. قازىر جاعداي باسقاشا. مەن سونىڭ ورنىنا جىرتىس-كوكپار ۇيىمداستىرۋدى ۇسىنىپ ءجۇرمىن. ول بىلاي: ۇزاتىلىپ بارا جاتقان قىزدىڭ اياعىنىڭ استىنا جىبەك ماتا توسەلەدى. قىزدى جىگىت جاق اق ماتا ۇستىمەن جۇرگىزىپ الىپ كەتكەننەن كەيىن قالعان جۇرت تا جان-جاققا بىتىراي جونەلمەي، ءبىراز كىدىرۋى كەرەك. تامادا ولاردى اق ماتانىڭ ەكى جاعىنا ءبولىپ تۇرعىزىپ، الگى جىبەك ماتانى ورتاعا تاستاپ، جىرتىس-كوكپار جاسايدى.
ادامدار ارتىسىپ-تارتىسىپ، جاڭاعى ماتادان جىرتىپ الادى: بىرەۋگە ءبىر جاپىراعى تيەر، بىرەۋ قوماقتىراق جىرتىپ الار - ايتەۋىر ەشكىمگە دە ۇلەسسىز قالمايدى. بۇل - ءبىر جاعىنان، «وسىنداي توي ءارقايسىمىزدىڭ شاڭىراعىمىزدا بولسىن» دەگەن ىرىم، تابارىك، ەكىنشى جاعىنان، ايالاپ وسىرگەن اققۋىن قولدان ۇشىرىپ، كوڭىلى جارىم بوپ تۇرعان اتا-انانىڭ، اعايىننىڭ ەڭسەسىن تىكتەۋ، تويدىڭ سوڭىن دۋمان قىزىققا اينالدىرىپ جىبەرۋ»، - دەيدى اجە.
فوتو: muslim.kz
«الماتى اقشامى»