ورالدا كورەيلەر ءوز مادەنيەتىن كورسەتتى - فوتو
فويەدە كورەي ۇلتى وكىلدەرىنىڭ سالت-ءداستۇرى، مەرەكەلەرى جونىندە فوتوكورمە، وسى تىلدەگى كىتاپتار كورمەسى ۇيىمداستىرىلىپ، ۇلتتىق تاعامدار قويىلدى.
شارا بارىسىندا بيىل قۇرىلعانىنا شيرەك عاسىر تولعان ب ق و كورەي ەتنومادەني بىرلەستىگىنىڭ تىنىس- تىرشىلىگى تۋرالى بەينەفيلم كورسەتىلدى. كورەي حالقىنىڭ ءان-بيلەرىنەن قۇرالعان كونسەرتتىك باعدارلاما قويىلدى. كورەيلەردە دە جاسى ۇلكەندى سىيلاۋ، ايتقانىن قالت ەتپەي ورىنداۋ سىندى يگى ءداستۇر، تۇساۋكەسەرگە ۇقساس مەرەكە بار. ءسابي ءبىر جاسقا تولعاندا، وعان ۇلتتىق كيىم كيگىزىپ، ءتۇرلى زاتتار قويىلعان ۇستەلگە قاراي جىبەرەدى. ءبۇلدىرشىن نەنى قولىنا ۇستاسا، وسكەندە سوعان ساي ماماندىقتى مەڭگەرەدى (مىسالى، كىتاپتى ۇستاسا، عىلىمعا بەت بۇرادى) دەگەن ىرىم بار. كەلۋشىلەر ءۇشىن وسى كورىنىس تە قويىلدى.
اتالمىش بىرلەستىك ءتوراعاسى ماكسيم پاكتىڭ ايتۋىنشا، قازىرگى كەزدە وڭىردە 850 دەن استام كورەي ۇلتىنىڭ وكىلدەرى تۇرادى. ولار باسقا دا ۇلت وكىلدەرىمەن بىرلەسە وتىرىپ، وبلىستىڭ قوعامدىق- ساياسي ومىرىنە بەلسەنە ارالاسىپ كەلەدى. وزدەرىنىڭ سالت- ءداستۇرىن، مادەنيەتى مەن ءتىلىن دامىتىپ قانا قويماي، بىرلەستىك مۇشەلەرى مۇگەدەكتەرگە دە قولۇشىن سوزۋدى ىزگى ىسكە اينالدىرعان. ايتالىق، «كەلەشەككە كوزقاراس» الەۋمەتتىك جوباسى اياسىندا «اربا» قوعامدىق بىرلەستىگى جانىنان مۇگەدەكتەرگە ارنالعان سىلاۋ كابينەتىن اشتى. وعان قوسا ق ح ا جىلى اياسىندا وتىزعا جۋىق قايىرىمدىلىق شاراسىن وتكىزدى.
ەسكە سالا كەتەيىك، 2012 -جىلى ورالدا كورەيلەردىڭ قازاق جەرىنە دەپورتاتسيالانعانىنا 75 جىل تولۋىنا وراي «قازاق حالقىنا مىڭ العىس» اتتى مونۋمەنت اشىلعان بولاتىن. بۇل كورەيلەردىڭ جەر اۋدارىلىپ كەلگەندە، وزدەرىن جاتسىنباي، پانالاتقان قازاق حالقىنا دەگەن ريزاشىلىعىن بىلدىرەدى.
اۆتور: ەلجان ەرالى