ون سەگىزىندە وتاۋ قۇرعان قازاقستاندىق تانىمال ەسىمدەر - فوتو

استانا. قازاقپارات - كوپشىلىك جاس ءارى كورىكتى تانىمال تۇلعالاردىڭ وتباسىلىق ومىردەن بۇرىن ونەردە شىعارماشىلىق شىڭعا جەتۋدى ماقسات تۇتاتىنىن جاقسى بىلەدى.

الايدا، قازاقستاندىق تانىمال تۇلعالاردىڭ ىشىندە ون سەگىزىندە وتاۋ قۇرىپ، شاڭىراق يەسى اتانعان جۇلدىزدار دا از ەمەس.

كامەلەت جاسىنا تولا سالىسىمەن، نەكەسىن قيعان وتاندىق جۇلدىزداردى نازارلارىڭىزعا ۇسىنادى.

ءنۇرالى اليەۆ جانە ايدا يماشيەۆا

وتباسىن قۇرعان جاسى: 18 جاس

ەلباسى نۇرسۇلتان نازاربايەۆتىڭ بىرنەشە جىل بۇرىن ايتقان "سۇيەسىڭ بە؟ " - "سۇيەم". - "اكە- شەشەڭ قارسى ما؟ " - "قارسى". "جىگىت ەمەسسىڭ بە؟ " - "جىگىتپىن". "بار دا، ۇيلەن. ەشكىمنەن سۇراما" دەگەن سوزدەرى نەمەرەسى ءنۇرالى اليەۆكە ايتىلعان ەدى.

 كەيىننەن بەلگىلى بولعانداي، مەكتەپتى جاڭادان بىتىرگەن ءنۇرالى ۇيلەنۋگە بەل بۋعاندا، اتا- اناسى بۇعان قارسى بولعان ەكەن. ءبىراق ناعاشى اتاسى ماسەلەنىڭ شەشىمىن تاۋىپ، جاستاردىڭ تويى دۇركىرەپ وتكەن. بۇگىندە ءنۇرالى اليەۆ 30 جاستا جانە ءتورت بالانىڭ اكەسى.

 اينۇر تولەۋوۆا جانە جولداسى مۇحامەد

وتباسىن قۇرعان جاسى: 18 جاس

 

 2011 -جىلعى "قازاقستان ارۋى" اينۇر تولەۋوۆانىڭ سۇلۋلىعىنا سۇلۋلىق سايىسىنان كەيىن تامسانباعان جان جوق. كورىكتى بويجەتكەن "الەم ارۋى" بايقاۋىنا قاتىسقان سوڭ، مودەلدىك مانسابىن جالعاستىرماي، شاڭىراق كوتەرۋدى ءجون سانادى. 2014 -جىلدىڭ قىركۇيەك ايىندا تۇرمىس قۇرعان اينۇر تولەۋوۆا قازىر جاس انا اتانىپ وتىر.

 سەرىك ساپيەۆ جانە ءمولدىر ساپييەۆا

وتباسىن قۇرعان جاسى: 21

 

سەرىك ساپيەۆ 29 جاسىندا عانا وليمپيادا چەمپيونى اتاعىنا قول جەتكىزدى. جەڭىسكە جەتۋ جولىندا وعان جۇبايى ءمولدىر ۇنەمى قولداۋ كورسەتىپ وتىرعان. ساپيەۆتى اقپارات كوزدەرى قازاقستاننىڭ ەڭ تارتىمدى جىگىتى دەپ تانىعاندا دا، ايەلى بۇعان سىر بەرمەي، وزگەلەردىڭ تەك سىرتتان باقىلاپ، قىزعانىشپەن قارايتىنىن ايتقان. قازىر تانىمال جۇپتىڭ ءۇش قىزى بار.

 راحات تۇرلىحانوۆ جانە ءجاميلا ءابىلوۆا

وتباسىن قۇرعان جاسى: 19 جاس

 

2000 -جىلى جۇلدىزى جانىپ، قازاقستاندىق بويجەتكەندەردىڭ ارمانىنا اينالعان راحات تۇرلىحانوۆ وتاندىق شوۋ- بيزنەستىڭ شىڭىن باعىندىرعان بولاتىن. كەيىننەن ءانشى ديپلوماتيالىق مانسابىن قولعا الىپ، مەملەكەتتىك قىزمەت اتقارا باستادى. راحات تۇرلىحانوۆ 19 جاسىندا ءانشى بولات ءابىلوۆتىڭ قىزى ءجاميلا ابىلوۆاعا ۇيلەنگەن بولاتىن. بۇگىندە جۇلدىزدى جۇپتىڭ ەكى بالاسى بار.

 قايرات نۇرتاس جانە جۇلدىز ابدىكارىموۆا

وتباسىن قۇرعان جاسى: 18 جاس

 

قازاق ەستراداسىنىڭ جارىق جۇلدىزى قايرات نۇرتاس جەكە ءومىرى تۋرالى اشىق ايتۋدان، قانداي دا ءبىر اقپارات بەرۋدەن باس تارتادى. الايدا، عالامتوردا كەڭىنەن تارالعان ەسكى سۋرەتتەردەن جانكۇيەرلەرى ونىڭ بوزبالا كەزىندە وتاۋ قۇرعانىنا كۋا بولدى. قازىر قايرات نۇرتاستىڭ ءۇش بالاسى بار.

 دەرەككوز: NUR. KZ