ەلوردا اكىمدىگى باسپا ءسوز قىزمەتىنىڭ حابارلاۋىنشا، ءىس- شارا ءداستۇر بويىنشا كاسىبي مامانداردىڭ ەرەكشە نازارىن اۋداردى. قاتىسۋشىلار مەن شاقىرىلعاندار قاتارىندا استانا قالاسى اكىمدىگىنىڭ، ق ر ءبىلىم جانە عىلىم مينيسترلىگىنىڭ وكىلدەرى، جۇمىس بەرۋشىلەر، استانا قالاسىنىڭ كاسىپكەرلەر پالاتاسىنىڭ وكىلدەرى، ءماسليحات دەپۋتاتتارى، تەحنيكالىق جانە كاسىپتىك ءبىلىم بەرۋ سالاسىنىڭ قىزمەتكەرلەرى بار.
فورۋمنىڭ باستى ماقساتى - وقۋ ورىندارى مەن وندىرىستىك كاسىپورىندار اراسىنداعى ۇيلەستىرۋدى جاقسارتۋ، وقۋ بىتىرۋشىلەردىڭ جۇمىسقا ورنالاسۋىنا كومەك كورسەتۋ، ورتا بۋىن مامانداردىڭ يميدجى مەن مارتەبەسىن كوتەرۋ، تەحنيكالىق جانە كاسىپتىك ءبىلىم بەرۋدى دامىتۋ.
فورۋمدى استانا قالاسى ءبىلىم باسقارماسى باسشىسىنىڭ ورىنباسارى ق. س. سەنعازيەۆ قۇتتىقتاۋ سوزبەن اشتى. ونىڭ ايتۋىنشا، ەلوردالىق كوللەدجدەردە وقىتۋدىڭ دۋالدى جۇيەسى بەلسەندى قارقىنمەن ەنگىزىلۋدە. بۇل- دايىندىقتىڭ تەوريالىق بولىگى ءبىلىم بەرۋ ۇيىمدارىنىڭ بازاسىندا، ال پراكتيكالىق بولىگى جۇمىس ورىندارىندا وتەتىن وقۋ ءتۇرى. قازىرگى كەزدە 34 كاسىپورىن10 وقۋ ورنىندا كادرلاردى دايارلاۋدا دۋالدى وقىتۋ ەلەمەنتتەرىن قولدانۋدا. سونداي- اق، بيىل وقىتۋدىڭ بۇل ءادىسى 9 كوللەدجدە 9 ماماندىق بويىنشا ەنگىزىلمەك. نەگىزىنەن، ءبىلىم بەرۋ، مەديتسينا، قۇرىلىس جانە تەمىرجول سالالارىندا.
«استانا قالاسى اكىمدىگىنىڭ جۇمىسپەن قامتۋ ورتالىعى» ك م م ديرەكتورى و. ك. وماردىڭ ايتۋىنشا، ەلوردادا ەر ادامدار اراسىندا نەعۇرلىم سۇرانىسقا يە ماماندىق - قۇرىلىسشى- تەحنيك، تاس قالاۋشى، ءار ءتۇرلى جۇيەلەر مەن جابدىقتاردى مونتاجداۋشى، بايلانىس مونتاجداۋشىسى، ەلەكتريك، ەلەكترمەن جانە گازبەن دانەكەرلەۋشى، قۇرىلىس ماشينالارى مەن مەحانيزمدەرىنىڭ ماشينيستى، كران ماشينيستى، جۇك تاسيتىن اۆتوكولىك جۇرگىزۋشىسى، سلەسار- سانتەحنيك. ايەلدەر اراسىندا اسا قاجەتتى ماماندىقتار - مەكتەپكە دەيىنگى مەكەمەلەردىڭ تاربيەشىسى، تىگىنشى، مەدبيكە، اسپاز، ناۋبايشى، ساتۋشى، بۋحگالتەر، اكىمشى، شاشتاراز.
فورۋم بارىسىندا سالالىق ۇيىمدار، ءىرى كومپانيالار جانە وقۋ ورىندارى اراسىندا مەموراندۋمدار مەن كەلىسىمشارتتارعا قول قويىلدى. ءىس- شارا اياسىندا تەحنيكالىق جانە كاسىپتىك ءبىلىم بەرەتىن وقۋ ورىندارىنىڭ كورمەسى ۇيىمداستىرىلدى. قالالىق ۇيىمدارمەن جانە كاسىپورىندارمەن الەۋمەتتىك سەرىكتەستىك، دۋالدى وقىتۋدىڭ جاي- كۇيى، حالىقارالىق ىنتىماقتاستىقتى دامىتۋ جانە ت. ب. اقپارات ۇسىنىلدى.
سونداي- اق، فورۋمدا ۇزدىك الەۋمەتتىك سەرىكتەستەر مەن ۇزدىك كوللەدجدەردى تەحنيكالىق جانە كاسىپتىك ءبىلىم بەرۋ جۇيەسىن دامىتۋعا قوسقان ۇلەسى ءۇشىن ماراپاتتاۋ ءراسىمى ءوتتى. ءسويتىپ، «التىن جۇرەك» نوميناتسياسىندا قازاق تەحنولوگيا جانە بيزنەس كوللەدجى جەڭىمپاز اتاندى، «ۇزدىك ىنتىماقتاستىق» ماراپاتىن ەكونوميكا، تەحنولوگيا جانە تاعام ءوندىرىسىن ستاندارتتاۋ كوللەدجى يەلەندى. تۇران كوللەدجى «ۇزدىك حالىقارالىق جەتىستىك» نوميناتسياسىندا ۇزدىك اتاندى.