مينيستر قازاقستاندا جايىلىم تاپشىلىعى ماسەلەسى بار ەكەندىگىن مويىندادى - فوتو

الماتى. قازاقپارات - قازاقستاننىڭ وڭتۇستىگىندە جايىلىم تاپشىلىعى ماسەلەسى ءالى دە وزەكتى. بۇگىن ق ر اۋىل شارۋاشىلىعى ءمينيسترى اسىلجان مامىتبەكوۆ ق ر ءماجىلىس دەپۋتاتى جەكسەمباي دۇيسەنبايەۆتىڭ مالىمدەمەسىنە قاتىستى تۇسىنىكتەمە بەردى.

حالىق قالاۋلىسى بۇگىنگى پارلامەنت وتىرىسىندا اۋىل شارۋاشىلىعىنا بولىنگەن جەرلەر ءوز ماقساتىندا پايدالانىلماي جاتقانى تۋرالى مالىمدەمە جاساعان بولاتىن.

مينيستر مۇنداي پروبلەما اسىرەسە وڭتۇستىك وڭىرلەردە وزەكتى ەكەندىگىن جەتكىزدى.

ونىڭ ايتۋىنشا، قازاقستاندا 180 ميلليون گەكتار اۋىلشارۋاشىلىعى ماقساتىندا پايدالانىلاتىن جەر بار، ونىڭ 150 ميلليون گەكتارى جايىلىمدار.

 «ەگىستىك ماقساتتا 100 ميلليون گەكتار جەر بولىنگەن. حالىق سانىنىڭ ازدىعىنا قاراماستان، مۇنداي ماسەلە بار. بەرىلگەن جەرلەردە باعاتىن مال جوق، نەمەسە ەگىستىككە پايدالانىلىپ جاتقان جوق. ال، بيزنەسپەن اينالىسقىسى كەلەتىندەردىڭ جەرى جوق. وسىنداي پارادوكسالدى جاعداي بار. ءبىراق، بارلىق جەردە ەمەس. سولتۇستىك ايماقتاردا اكىمدەر بوس جەرلەردى «اينالىسام» دەگەن كاسىپكەرگە بەرۋگە دايىن. ال، وڭتۇستىكتە بۇل پروبلەما ءالى دە وزەكتى»، - دەدى ا. مامىتبەكوۆ.

مينيستر وسى ماسەلەنى شەشۋ ماقساتىندا جەر سالىعى كوتەرىلگەنىن ايتتى. ماقساتتى تۇردە پايدالانباي وتىرعان كاسىپكەرلەرگە ەندى 10 ەسە ارتىق تولەۋگە تۋرا كەلەدى.

 

 

 

اۆتور: گۇلميرا عوسمان-ءالي