ق. كوشەربايەۆ: «يسلام» مەن «ەكسترەميزمدى» ەگىز ۇعىم دەۋ -قاتە تۇسىنىك - فوتو

قىزىلوردا. قازاقپارات - بۇگىن قىزىلوردادا «يسلام ءدىنى - بەيبىتشىلىك باستاۋى» اتتى حالىقارالىق عىلىمي-تاجىريبەلىك كونفەرەنسيا ءوتتى.

كونفەرەنسيا جۇمىسىنا رەسەي فەدەراتسياسى، تۇركيا، ەگيپەت اراب رەسپۋبليكاسى، وزبەكستان جانە قىرعىز رەسپۋبليكالارىنان جانە ت. ب. ەلدەردەن ساراپشىلار مەن تەولوگ عالىمدار قاتىستى.

كونفەرەنسيانى اشقان وبلىس اكىمى، ساياسي عىلىمدارىنىڭ دوكتورى قىرىمبەك كوشەربايەۆ ءدىن ماسەلەسى بۇكىل الەمدە ءورشىپ تۇرعانىن اتاپ ءوتتى.

«2015-جىلى ەكسترەميزم قۇرباندارىنىڭ سانى 80 پايىزعا ارتتى. تەرروريزم بۇكىل الەمگە قاۋىپ ءتوندىرىپ تۇرعان ۇلكەن كۇش. كوپشىلىك «يسلام» ۇعىمى مەن «ءدىني ەكسترەميزمدى» شەندەستىرىپ ءجۇر. وسى ارادا ەلباسى يسلامدى بەيبىتشىلىك پەن مەيىرىمدىلىكتىڭ، توزىمدىلىك پەن ادىلەتتىلىكتىڭ ءدىنى، بەيبىتشىلىكتىڭ باستاۋى ەكەنىن ۇدايى ايتىپ كەلەدى. «قاسيەتتى قۇراندا ءبىر ادامدى ءولتىرۋ بۇكىل ادام بالاسىن ولتىرگەنمەن تەڭ»، - دەدى نۇرسۇلتان ءابىش ۇلى V الەمدىك جانە ءداستۇرلى دىندەردىڭ كوشباسشىلارىنىڭ سەزىندە. سوندىقتان «يسلام» مەن «ەكسترەميزمدى» ەگىز ۇعىم دەۋ قاتە تۇسىنىك»، - دەدى وبلىس اكىمى.

ق ر مادەنيەت جانە سپورت مينيسترلىگى ءدىن ىستەرى كوميتەتى ءتوراعاسىنىڭ ورىنباسارى عابيت ابزالبەك يسلام ءدىنىنىڭ دىڭگەگى ءبىرتۇتاس ەكەنىن تىلگە تيەك ەتتى. ول بەيبىتشىلىككە باستايتىن ءدىن ەكەنىن اتاپ ءوتتى.

«ەلدەگى ءدىني احۋال تۇراقتى. دەگەنمەن، ءدىندى جامىلىپ جۇرگەن ءتۇرلى تەرىس اعىمداردىڭ بار ەكەنىن دە جوققا شىعارا المايمىز. سوندىقتان، قۇرمەتتى كونفەرەنتسياعا قاتىسۋشىلار، بارشاڭىزدى قوعامداعى تۇراقتىلىقتى ساقتاۋعا اسا ءمان بەرۋگە شاقىرامىن. ويتكەنى تۇراقتىلىقتى ۇستاپ تۇرۋ -مەملەكەتتىڭ نەگىزگى ۇستانىمدارىنىڭ ءبىرى»، - دەدى عابيت ابزالبەك.

بارلىق كونفەرەنسيا قاتىسۋشىلارى ءداستۇرلى ءدىننىڭ بەيبىتشىلىكتىڭ باستاۋى ەكەنىن ءبىراۋىزدان قولدايتىندىقتارىن ءبىلدىردى. سونىمەن قاتار، سەنىم ماسەلەسى ادامنىڭ دا، بۇكىل الەم ءۇشىن دە ماڭىزدى ەكەنىن ايتتى. كونفەرەنسيا قورىتىندىسى بويىنشا ىنتىماقتاستىق قارىم-قاتىناستى بەكىتەتىن ۇندەۋ جاريالاندى.

ايتا كەتەتىن ماسەلە  قىزىلوردا وبلىسىنان 48 ستۋدەنت قازىر «نۇر-مۇباراك» ۋنيۆەرسيتەتىندە ءبىلىم الۋدا. سونىمەن قاتار، ايماقتا ۇنەمى حالىقپەن كەزدەسۋلەر، دوڭگەلەك ۇستەلدەر ۇيىمداستىرىلىپ، ءتۇرلى شارالار وتكىزىلىپ كەلەدى. وڭىردە 166 ءدىني بىرلەستىك بار، ونىڭ 12 ءسى جەرگىلىكتى، ال 54 ءى رەسپۋبليكالىق ۇيىمداردىڭ فيليالدارى. سونداي-اق، قازاقستان مۇسىلماندار قاۋىمداستىعىنا قاراستى 152 مەشىت بار. جىل باسىنان بەرى تاعى 4 مەشىت اشىلدى. تۇرعىنداردىڭ 95 پايىزى وبلىستاعى ءدىني احۋالدى تۇراقتى دەپ باعالاعان.