ينۆەستورلارعا ۇسىنىلاتىن جوبالاردىڭ دەڭگەيى دە، ساپاسى دا تومەن - ءا. يسەكەشەۆ

استانا. قازاقپارات - ينۆەستورلارعا ۇسىنىلاتىن جوبالاردىڭ دەڭگەيى دە، ساپاسى دا تومەن. بۇگىن ۇكىمەت وتىرىسىندا ينۆەستيتسيالار جانە دامۋ ءمينيسترى اسەت يسەكەشيەۆ «نۇرلى جول» باعدارلاماسىنىڭ جۇزەگە اسۋى اياسىنداعى ينۆەستيتسيالار تارتۋ پروبلەمالارىنا توقتالىپ، وسىلاي ءمالىم ەتتى.

«بىرىنشىدەن، ينۆەستورلاردى تارتۋدى بەلسەندىرە ءتۇسۋ ءۇشىن قازاقستاندىق تاراپتىڭ ۇسىنعان جوبالارىنىڭ دەڭگەيى دە، ساپاسى دا تومەن. ينۆەستيتسيالىق فورۋمدار اياسىندا قازاقستانعا 500 دەن استام كومپانيالاردىڭ وكىلدەرى كەلدى. ياعني، ينۆەستورلاردىڭ قازاقستانعا قىزىعۋشىلىعى جوعارى، ولار شىنىمەن دە قازاقستاندى كورشىلەس ەلدەرگە شىعاتىن قاقپا رەتىندە كورە الادى. ەلىمىزدە ساياسي، ەكونوميكالىق تۇراقتىلىق تا بار. وسىعان وراي، ينۆەستورلار ۇلكەن قىزىعۋشىلىقپەن كەلەدى، الايدا، ولار وڭىرلەردەگى بيزنەس تاراپىنان ۇسىنىستاردىڭ مۇلدەم از ەكەنىن ايتادى. ينۆەستيتسيالىق ۇسىنىستار ۇلتتىق كومانيالار تاراپىنان دا، جەكە كومپانيالار تاراپىنان دا مۇلدەم ماردىمسىز»، - دەدى ءا. يسەكەشەۆ.

ونىڭ سوزىنە قاراعاندا، ينۆەستورلار ءۇشىن جەر ينفراقۇرىلىمىنا قولجەتكىزۋ دە ۇلكەن پروبلەماعا اينالىپ وتىر. ماسەلەن، قىتايلىق شىنى-بوتەلكەلەر شىعارۋ تۋرالى ۇسىنىلعان جوباعا الماتى وبلىسىنىڭ اكىمى 1,5 جىل بويى ينفراقۇرىلىمى بار جەر ۋچاسكەسىن تاۋىپ بەرە الماعان. ءدال وسىنداي جاعداي ەلىمىزگە ينۆەستيتسيا جاساعىسى كەلگەن فارماتسيەۆتيكالىق سالادا دا ورىن العان.

«بۇنداي ماسەلە بارلىق وڭىرلەردە ورىن الىپ جاتىر. سوندىقتان دا، وبلىس اكىمدەرىنەن بۇل ماسەلەلەردى شەشۋدى شاپشاڭداتۋدى سۇرايمىز»، - دەدى مينيستر.

اۆتور: قانات مامەتقازى ۇلى