قىتايداعى قانداستارىمىز اتا جۇرتتىڭ اقپاراتىنا ءزارۋ - كەسكىن

استانا. قازاقپارات - قىتايداعى قازاق تەلەارنالارى وتاندىق ارىپتەستەرىمەن باعدارلاما الماسۋدى جولعا قويعىسى كەلەدى.

ويتكەنى ونداعى قانداستارىمىز بىزدەگى اقپاراتتى دەر كەزىندە الا الماي وتىر. اسىرەسە، تاريحي وتاندارى قازاقستاندا تۋعان- تۋىستارى بارلار مەن بالالارى وقىپ جاتقاندار قاتتى الاڭداۋلى. قىتايدىڭ شىڭجاڭىندا بۇكىل ەلگە اقپارات تاراتاتىن ءۇش قازاق ءتىلدى تەلەارنا بار.

ولار تاۋلىگىنە 38 ساعات جۇمىس ىستەيدى. ياعني باسىم بولىگى كۇندەلىكتى رەسمي جاڭالىقتار بولسا، بۇعان قوسا انا تىلىمىزدە 14 باعدارلاما دايىندايدى.

وعان قازاق تىلىندە دۋبلياجدالاتىن 2500 ساعاتتىق سەريالداردى قوسىڭىز. سوعان قاراماستان جەرگىلىكتى كورەرمەندەردىڭ قازاقستاندىق تەلەونىمدەرگە سۇرانىسى جوعارى. بۇنداعى ارىپتەستەرىمىزدىڭ تىنىس-تىرشىلىگىمەن تانىسۋعا كەلگەندە، باسشىلىقتىڭ ايتقان ەڭ ءبىرىنشى ماسەلەسى وسى.  قىتايداعى قازاق ءتىلدى نەگىزگى اقپاراتتىق ارنانىڭ اتاۋى -  «حابار امبەباپ». بۇل ۇيىمداعى تىلشىلەرمەن اڭگىمەلەسە كەلە، قازاقستاندىق تەلەارنالار مۇندا كورسەتىلمەيتىنىنە كوز جەتكىزدىك. وعان نەگىزگى كەدەرگى -  الەمدىك ب ا ق سالاسىندا بولىپ جاتقان ءتۇرلى قۇقىقتىق وزگەرىستەر.

قانات ەرەجەپ، «شىڭجاڭ» تەلەۆيزياسى پرەزيدەنتىنىڭ ورىنباسارى:

- كەيىنگى كەزدە ەكى جاقتا دا، ماسەلەن، قازاقستاندا دا زاڭ كۇشەيدى. سونىمەن قاتار، اۆتورلىق قۇقىققا ساياتىن كوپتەگەن نارسەلەر بولدى. ءبىز جاقتا دا سولاي بولىپ قالدى. ماسەلەن، بىزدە دەرەكتى فيلم ءتۇسىرۋ جەكەشەلەندى. سودان كەيىن ءبارى «اۆتورلىق قۇقىق» دەيدى دە ۇلكەن اقشا سۇرايدى.

جەرگىلىكتى كورەرمەندەر كوبىنە ادەبي جانە مادەني باعدارلامالاردى ءسۇيىپ كورەدى ەكەن. بۇعان قوسا تاريحي دەرەكتى فيلمدەرگە قىزىعۋشىلىق جوعارى. سايكەسىنشە، وسى باعىتتاعى وتاندىق تەلەتۋىندىلارعا سۇرانىس زور. قىتايداعى قازاق ارنالارى تەك وسى باعدارلامالاردى الىپ قانا قويماي، وزدەرىنىڭ ءتول ونىمدەرىن اتامەكەندەگى اعايىندارعا تانىستىرعىسى كەلەدى. ءبىر سوزبەن ايتقاندا، قوس ەلدىڭ تىلشىلەرى اراسىنداعى بايلانىس ودان سايىن بەكەمدەي تۇسسە دەگەن نيەت- تىلەكتەرى بار.

ەسبول تايىپ، «شىڭجاڭ» تەلەۆيزياسى تەحنيكالىق ءبولىم باسشىسىنىڭ ورىنباسارى:

- وزدەرىڭ كەلىپ جاتسىڭدار، كورىپ جاتسىڭدار. وسىنىڭ ءوزى بايلانىس دەپ ويلايمىن. ەندى وسىنداي بايلانىستار كوبەيە بەرسىن دەپ تىلەيمىن. سىزدەردىڭ ارنالارىڭىزدى تىكەلەي كورە الماسا دا، قىتايداعى قازاقتار ينتەرنەت ارقىلى اقپارات قابىلداپ جاتادى.

بۇگىنگى تاڭدا قىتايدا 1,5 ميلليوننان اسا قازاق ءتىلدى اۋديتوريا بار. ولار اقپاراتتى تەك تەلەارنالاردان عانا ەمەس، انا تىلىمىزدە جارىق كورەتىن جەرگىلىكتى باسىلىمداردان الادى. ءدال وسىنداي بىرنەشە راديو دا تاۋلىك بويى جۇمىس ىستەيدى. ال ەندىگى ماقسات -  قازاقستاندىق تۋىندىلاردى تىكەلەي تاماشالاۋعا مۇمكىندىك الۋ. كورشى جاتقان قوس ەل اراسىنداعى ەكونوميكالىق ءارى مادەني ىنتىماقتاستىق كۇن ساناپ نىعايىپ كەلەدى. وسى تۇرعىدا الىستاعى اعايىن اتالمىش ارمانعا جاقىن بولاشاقتا قول جەتەدى دەپ ۇمىتتەنىپ وتىر.

www.24.kz