بۇگىن استانادا «تاريحى تەرەڭ اق جايىق» كورمەسى اشىلادى
بۇل تۋرالى ۇلتتىق مۋزەيدىڭ باسپا ءسوز قىزمەتى حابارلادى.
كورمە باتىس قازاقستان وبلىستىق مۋزەي قورلارى ارقىلى ەلوردا تۇرعىندارى مەن قوناقتارىنا اق جايىق ءوڭىرىنىڭ ماتەريالدىق جانە رۋحاني مادەنيەتىنىڭ باعا جەتپەس قۇندىلىقتارىن كورسەتۋدى جانە ولكە تاريحىمەن تەرەڭىرەك تانىستىرۋدى كوزدەيدى.
كورمەگە ارحەولوگيالىق قازبا جۇمىستارى كەزىندە تابىلعان ءۇشبۇرىش، شىرشا، رومب ورنەكتى قىش، شىعىر قۇمىرالار، جايىق قالاشىعىنىڭ ورنىنان تابىلعان كەسەنە قالدىقتارى جانە كىرپىش تاستار قويىلادى.
سونىمەن قاتار ەكسپوزيتسيالاردىڭ قاتارىندا ب. د. د VІ-V عاسىرلارعا تيەسىلى تاقساي وبا- كەشەنىنەن 2012-جىلى (ب ق و تەرەكتى اۋدانى، دوليننوە ەلدى-مەكەنى) تابىلعان «التىن حانشايىمنىڭ» جاڭعىرتىلعان نۇسقاسى، ەجەلگى سارمات كەزەڭىنە جاتاتىن اقسۇيەك ايەل جەرلەنگەن جەردىڭ ورتەنگەن اعاش بورەنەلەرى، عۇرىپتىق ىدىستار بولادى.
بۇعان قوسا كوپشىلىككە 1969-جىلى سانتاس جونىنداعى وبالاردان تابىلعان قىپشاق جاۋىنگەرىنىڭ مۇردەسى، قىپشاق جاۋىنگەرىنىڭ قارۋ-جاراقتارى، ە. پۋگاچيەۆ بۇلىگىن باسۋعا قاتىسۋشىلارعا 1775-جىلى ورىس پاتشايىمى ІІ ەكاتەرينا سىي رەتىندە بەرگەن قولعاپ، ورىس اقىنى ا. پۋشكين كيگەن كيىمنىڭ كوشىرمەسى ۇسىنىلادى.
جينالعان جۇرتقا كىشى ءجۇزدىڭ سوڭعى حانى جاڭگىر حان مەن فاتيما حانىم كيگەن كيىمدەردىڭ كوشىرمەلەرىن، ا. ن. ءحارۋزيننىڭ 1891-جىلى جارىق كورگەن «كيرگيزى بۋكەيەۆسكوي وردى» اتتى كىتابىن، سونىمەن قاتار، باتىس الاشوردا مەن ۇلى وتان سوعىسى كەزەڭىندەگى مۇراعاتتىق قۇجاتتاردى كورۋ مۇمكىندىگى بەرىلەدى.
كوپشىلىك كۇيشى-كومپوزيتور دينا نۇرپەيىسوۆانىڭ قامزولىن، كۇيشى ق. جانتىلەۋوۆتىڭ شاپانى مەن دومبىراسىن، اق جايىقتى مەكەن ەتەتىن وزگە ۇلت وكىلدەرىنىڭ ۇلتتىق كيىمدەرى مەن مۋزىكالىق اسپاپتارىن، ءا. قاستەيەۆتىڭ 1941-جىلى سالعان «قىز جىبەك پەن تولەگەننىڭ كەزدەسۋى» اتتى گرافيكاسىن جانە قازاق ارۋلارى قولدانعان زەرگەرلىك بۇيىمداردى تاماشالايدى.
كورمەنى باتىس قازاقستان وبلىستىق اكىمدىگىنىڭ قولداۋىمەن ق ر ۇلتتىق مۋزەيى، باتىس قازاقستان وبلىسىنىڭ مادەنيەت، مۇراعاتتار جانە قۇجاتتاما باسقارماسى مەن وبلىستىق تاريحي-ولكەتانۋ مۋزەيى ۇيىمداستىردى.
كورمە 2015-جىلعى 18- قاراشادان 2016-جىلعى 18- قاڭتارعا دەيىن جالعاسادى.