رەسەي تاريحشىلارى حالىقارالىق عىلىمي كونفەرەنسيادا قازاق حاندىعىنىڭ تاريحىن تالقىلادى

ماسكەۋ. قازاقپارات - ماسكەۋدەگى رەسەي مەملەكەتتىك كىتاپحاناسىندا «تۇركى الەمىنەن قازاق حاندىعىنا دەيىن» اتتى تاقىرىپتا حالىقارالىق عىلىمي-تاجىريبەلىك كونفەرەنسيا ءوتتى.

كونفەرەنسيانى قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ قولداۋىمەن م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ازيا جانە افريكا ەلدەرى ينستيتۋتى، رەسەي مەملەكەتتىك كىتاپحاناسىنىڭ شىعىس ادەبيەتى ورتالىعى ۇيىمداستىرعان.

كونفەرەنسياعا رەسەي، قازاقستان، ازەربايجان، قىتاي، تۇركيا، وزبەكستان، قىرعىزستان ەلدەرىنىڭ تاريحشىلارى مەن فيلولوگتارى قاتىستى.

جالپى، كونفەرەنسيا مىنبەرىنە شىعىپ، قازاق حاندىعىنىڭ تاريحى تۋرالى بايانداما جاساۋعا 140 عالىم-تاريحشى نيەت تانىتقان ەكەن. كونفەرەنسيانى اشقان م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ازيا جانە افريكا ەلدەرى ينستيتۋتىنىڭ پرەزيدەنتى ميحايل مەيەر «قازاق حاندىعىنىڭ تاريحى 550 جىلدان ارىدە جاتقانىن، سوندىقتان دا، كونفەرەنسيا تاقىرىبى «تۇركى الەمىنەن قازاق حاندىعىنا دەيىنگى كەزەڭدى قامتىپ وتىرعانىن» اتاپ ءوتتى.

قازاقستان رەسپۋبليكاسىنىڭ رەسەي فەدەراتسياسىنداعى ەلشى-كەڭەسشىسى مارات سىزدىقوۆ ايتۋىنشا، ەكى مىڭ جىلدان بەرى قازاقستان اۋماعىندا شامامەن جيىرما مەملەكەتتىك نەگىز بولسا، ال، 550 جىل بۇرىن قۇرىلعان قازاق حاندىعى كوشپەلى حالىقتى وركەنيەتكە باستاعان كەزەڭ ەدى.

ەلشى سونداي-اق مەملەكەت باسشىسى نۇرسۇلتان نازاربايەۆتىڭ قۇتتىقتاۋ ءسوزىن جەتكىزدى. وندا ەلباسى: «قازاق حاندىعى مەملەكەتتىك ۇيىم رەتىندە قازاق حالقىنىڭ شوعىرلانۋىنا ۇلكەن قىزمەت اتقاردى. ال، بۇگىندە قازاقستان مەملەكەتتىلىكتىڭ ەجەلگى داستۇرلەرىن جاڭارتىپ، ХХІ   عاسىرداعى دامۋعا بەت العان مەملەكەت. بولاشاقتى ويلاساق، وتكەنىمىزدى دە ۇمىتپاۋىمىز كەرەك» دەپ، كونفەرەنسيا قاتىسۋشىلارىنا جەمىستى جۇمىس تىلەدى.

 

 

 

  
اۆتور: كەنجەكەي توقتامۇرات قىزى