ماماندار: جۋرناليست قوعامداعى كەلىسىمگە سىزات تۇسىرمەۋى قاجەت
«بۇل رەتتە ۇلت پەن ۇلىس ۇيىپ، تاتۋلىقتىڭ تۇتقاسىنا اينالعان قازاقستاننىڭ باعا جەتپەس برەندىنەن ۇلگى الۋ قاجەت»، - دەيدى شەتەلدىك ماماندار. ەكىنشى جىل قاتارىنان قازاقستان حالقى اسسامبلەياسىنىڭ قولداۋىمەن حالىقارلىق دەڭگەيدە وتكىزىلىپ وتىرعان مەديافورۋمنىڭ قورىتىندىسىن شىعارعان شەتەلدىك ساراپشىلاردىڭ ويى وسىعان سايادى.
بۇگىندە ەتنوسارالىق قاقتىعىستاردىڭ الدىن الۋعا توسقاۋىل بولاتىن ۇيىم بۇل - قازاقستان حالقى اسسامبلەياسى. وسى ورايدا ۇلتتار تاتۋلىعىن قالىپتاستىرىپ، ونى دامىتۋ جولىندا بۇقارالىق اقپارات قۇرالدارىنىڭ ىقپالى زور. «ەشكىمدى كەمسىتۋگە جول بەرىلمەي، ءتىپتى جۋرناليستەردىڭ ەتيكا كودەكسىن قۇرۋدى ۇسىنۋى دا تەگىن ەمەس»، - دەيدى ساراپشىلار.
ۆلاديمير رەشەتوۆ، «ۆەستي سەگودنيا» گازەتىنىڭ ءتىلشىسى:
- قازاقستاندا 20 جىل كولەمىندە اتقارىلعان بۇل يگى ىستەن ءبىز ءسوزسىز تاجىريبە الۋىمىز قاجەت. مەن بۇل جەردەن وقىپ-توقىعانىمدى حالقىما بارىنشا جەتكىزۋگە تىرىسامىن. كوپ ۇلتتى ەل بولا تۇرا سۇتتەي ۇيىپ، بىرەگەي جەتىستىكتەرگە كەنەلگەندىكتەرىڭىز جايلى ءتىپتى پرەزيدەنتىمە دە ايتامىن.
حادج دجاسسەما باسەل، «ءال-ارابيا» تەلەارناسىنىڭ جۇرگىزۋشىسى:
- بۇل بىرەگەي تاجىريبە كەز كەلگەن مەملەكەتكە ۇلگى بولارى انىق. كوپ ۇلتتى ەلدى باي ەل دەپ ايتۋعا بولادى. ال ەگەر دە وسى ۇلت وكىلدەرى تاتۋ-ءتاتتى ءومىر سۇرسە، بۇل - ۇلكەن جەتىستىك.
www.24.kz