ەۋروپاداعى قازاق دياسپوراسى جايلى جازىلعان تۇڭعىش زەرتتەۋ كىتابى جارىق كوردى
بۇل ەۋروپاداعى قازاق دياسپوراسى جايلى جازىلعان تۇڭعىش زەرتتەۋ ەڭبەگى.
زەرتتەۋ كىتابىندا قازاقتاردىڭ ەۋروپا ەلدەرىنە قونىستانۋ تاريحى، سونداعى قازاق دياسپوراسىنىڭ قالىپتاسۋ كەزەڭدەرى جانە بۇگىنگى تۇرمىس تىرشىلىكتەرى، كەزدەسىپ وتىرعان كەيبىر رۋحاني- الەۋمەتتىك قيىندىقتار جايلى ءسوز بولادى.
كىتاپ قالامگەر دوسان بايمولدانىڭ «ازاتتىق» راديوسىندا قىزمەت ىستەگەن جىلدارىنداعى جيناعان مۇراعات قۇجاتتارى جانە ەۋروپادا تۇرىپ جاتقان قازاقتار اراسىندا وتكىزىلگەن ساۋالناما، كوپتەگەن سۇحبات ماتەريالدارى نەگىزىندە جارىق كورىپ وتىر.
«بۇل كىتاپ دوساننىڭ سوناۋ 1980-2000 -جىلدارى ەۋروپانىڭ پولشا، چەحيا سەكىلدى ەلدەردە جوعارى ءبىلىم الىپ، عىلىممەن جانە جۋرناليستىك قىزمەتتەرمەن اينالىسقان كەزىندە ەۋروپا قازاقتارى ءومىر ءسۇرىپ جاتقان قالالارعا ادەيى بارىپ، جۇرگىزگەن سۇحباتتارى مەن جيناقتاعان مول ماتەريالدارى نەگىزىندە جازىلدى.
اسىرەسە، اۆتوردىڭ 1996-2002 -جىلدارى پراگادا ورنالاسقان «ازاتتىق» راديوسىندا قىزمەت ەتىپ، سونداعى قازاق رەداكسياسىنىڭ «شەتەلدەگى قازاقتار» باعدارلاماسىن جۇرگىزگەن كەزەڭدەرى ايرىقشا جەمىستى بولدى. ەۋروپادا ءومىرىنىڭ 20 جىلىن وتكىزگەن زەرتتەۋشى عالىم دوسان بايمولدانىڭ «ەۋروپا قازاقتارى» كىتابى و باستا التايدان اۋعان ەل ءومىرىنىڭ جاڭا كەزەڭىن، كارى قۇرىلىققا قونىستانۋ جاعدايىن جان-جاقتى زەرتتەپ كورسەتۋگە ارنالعان العاشقى ەڭبەكتەردىڭ ءبىرى»، - دەيدى كىتاپقا العى ءسوز جازعان دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشەۆ.
ا ق ش، ۇلى بريتانيا، پولشا، چەحيا، ماجارستان، گەرمانيا، اۆستريا، فرانسيا، شۆەتسيا، نيدەرلانديا، شۆەيتساريا، تۇركيا، رەسەي، قىرعىزستان، وزبەكستان، يران جانە قىتاي سياقتى ەلدەردە عىلىمي جانە جۋرناليستىك ساپاردا بولعان ءتىلشى قازاق، موڭعول، پولياك، چەح، اعىلشىن جانە ورىس تىلدەرىن جەتىك مەڭگەرگەن. عالىمنىڭ بۇگىنگە دەيىن 12 كىتابى باسپا بەتىن كوردى.
ايتا كەتەيىك، بۇعان دەيىن دۇنيەجۇزى قازاقتارى قاۋىمداستىعىنىڭ «اتاجۇرت» باسپا ورتالىعىنان «شەتەلدەگى قازاقتار» سەرياسىمەن «موڭعولياداعى قازاقتار»، «قىتايداعى قازاقتار»، «وزبەكستانداعى قازاقتار»، «يرانداعى قازاقتار» اتتى كىتاپتار جارىق كورگەن بولاتىن. قازاق حاندىعىنىڭ 550 جىلدىعى قارساڭىندا شىققان «ەۋروپا قازاقتارى» كىتابى دا سول ەڭبەكتەردىڭ جالعاسى.
BAQ.kz